Vawiin chawhma khan Champhai DC Conference Hall-ah District Consultative Committee (DCC) & District Level Review Committee (DLRC) chu Bawrhsap Dr Naveen Aggarwal, IAS kaihhruaina hnuaiah neih a ni.

Chairman Dr Naveen Aggarwal chguan Bankers kalkhawmte chu mipuite rawngbawl an nih hrethar turin a fuih a. Harsatna awm leh hmachhawpte lang tlangtaka sawia inrawnkhawmna hun tha tak hmang turin a sawm a ni.

He Meeting-ah hian Pu  L.Lawmvela,  Lead District Manager, SBI Lead Bank Office Champhai chuan kalkhawmte lawmna thu a sawi a. Pu Samuel Liangousiam, Manager & LDO, RBI Sub Office, Aizawl leh Pu Henry L.Hrahsel, Director RSETI, Aizawl ten thu an sawi bawk a. Pu Rabishankar Likmabam, DDM, NABARD, Champhai District buatsaih Potential Link Credit Plan for 2019-20 tih chu   Chairman-in a tlangzarh a. Meeting-ah hian nikum September-December, 2018 Quarter chhunga Bank hrang hrangte hnathawh leh hmalaknate thlirletna neih a nih bakah hmachhawpte sawiho a ni. 

Meeting tarlan dan chuan December ni 31, 2018 thlenga Champhai District-a Bank hrang hrangte Credit Deposit (CD) ratio khaikhawm chu za zela 52.45 a ni a, hei hian CD Ratio bituk zat za zela  60 chu a phak lo  a ni.  Priority Sector tana loan pekchhuah zat chu za zela 69.58 a ni a, hei hian bituk za zela 40 chu   a khum a. Agricultural Segment hnuaia loan pekchhuah zat chu za zela 21.55 a ni a, hei hian bituk zat za zela 18 chu a khum bawk a ni.

Financial Year 2018-19 chhung khan Kisan Credit Card 219 pekchhuah hman a ni a,  DAY-NULM hnuaiah Self Help Group 18 te hnenah tanpuina cheng nuai 28.10 pek niin, tun thlenga pek chhuah tawh zat chu SHG 251 hnenah cheng nuai 500.12 a  ni. PMEGP hnuaiah Bank-ten diltu mi 86 hnenah cheng nuai 278.29 leh mi 29 dangte hnenah cheng nuai 119.80 an pe chhuak a. Self Help Group 151 te tan Saving Bank Account hawn a ni a, cheng nuai 13.37 dah luh tawh niin,  tun thlengin SHG 1376 te tan Saving Bank Account siam sak a ni a, cheng nuai 83.91thun tawh a ni.

Hemi hun chhung vek hian Thingtlang/Zokhaw mite tana bank hman dan zirtirna Digital Financial Literacy Awareness Programme tum 52 neih niin, hemi hmang hian mi 2148 te chu zirtirna pek an ni a. Housing Loan diltu 96 hnenah cheng nuai 1239 pek niin, tun thleng pekchhuah zat chu mi 785 hnenah cheng nuai 5540.36 a ni a. Education Loan pekchhuah a awm lova, tun thlenga pek zat erawh chu mi 27 te hnenah cheng nuai 33.27 a ni.

Crop Loan hmanga Gross NPA chu za zela 22.06 ani a,  Pradhan Mantri Mudra Yojana (PMMY) hnuaiah mi 586 (Shishu-306, Kishor-260,Tarun-20) hnenah loan cheng nuai 1016.98 hu pekchhuah a ni a. Social Security Scheme hnuaiah  bank kaltlanga  Cashless transaction  pek niin, Pradhan Mantri Suraksha Bima Yojana (PMSBY) hnuaiah mi 4942, Pradhan Mantri Jeevan Jyoti Bima Yojana (PMJJBY) hnuaiah mi 4188, Atal Pension Yojana (APY) hnuaiah mi 244 leh Stand up India hnuaiah mi 24  an inziaklut tawh a, RUPAY Debit Card hmangtu mi 13494 an awm thu tarlan a ni bawk a. Heng bakah hian Bank Security te sawiho a nih bakah inkaihhruaina tha zawk awm theih dan turte sawiho niin , Bank tinte pawh chak zawka hma laa, hunbi nei thlapa Data thehlut thin tura tih an ni.

Nikum December Ni 31 thleng khan Champhai District-ah Bank branch 23 a awm a (Mizoram pumah 206), hei hi mi 5467 in Branch 1 intawm ang zel a ni (Mizoram pumah chuan mi 5326 in Branch 1 intawm ang an ni). Hemi bakah hian ATM 11 a awm bawk. Nikum khan Champhaiah Axis Bank leh Indian Postal Payment Bank (IPPB) hawn thar niin, tun dinhmunah Champhai District-ah Bank hrang hrang 24 ten hna an thawk mek a ni.