658/2022-2023
Aizawl 27th May 2022: Vawiin khan Chief Minister Pu Zoramthanga leh Union Minister of State for Railways and Textiles Pi Darshana Jardosh hovin CM office ah Mizorama rel kawng siam hna thawh mek leh hmalak zelna tur chungchangah inhmuhkhawmna neih a ni a. Mizoram sawrkar leh Rail India Technical and Economic Service (RITES) Limited inkarah thawhhona thuthlung (Memorandum of Understanding) ziah a ni. Minister of Transport Pu TJ Lalnuntluanga pawh he hunah hian a tel a ni.

Chief Minister chuan Mizoram chu ram dang nena inri a nih avangin insumdawn tawnna leh thil dangah ram tan pawimawhna a neih thu sawiin, India state dangte nen inkalpawhna kawng tha siam belh zel a pawimawh thu leh, a bik takin India hmarchhak state zawng zawnga rel kawng siam belh a tihchangtlun chu pawimawh a tih thu a sawi a.

Minister of State Pi Darshana Jardosh pawhin rel kawng hmalakna chu Zoram mipuiin an hman tangkai thuai theih nan a huna thawk zo ngei tura thawktute a beisei thu a sawi bawk a. Textile changtu a nih bawk angin, state pawnah hralhchhuahna tur hmun Mizoramin a neih theih nan bawhzui ngaite bawhzuipui a tum thu a sawi bawk.

Meeting-ah hian Transport Department Secretary chuan sawrkar laipuia Ministry of Railways atanga puihna an mamawh chungchang sawiin, rel kawng siam mek leh siam belh mamawh presentation a pe a. Tuna Bairabi - Sairang rel kawng chu rel chawlhmun hmun lai ah a panna tur approach road siam a nih theih nan project buatsaihin siamin sawrkar laipuiah November 2021 khan a lo thehlut tawh a. Chu chu hmalak zel a nih theih nan Union minister hnenah hian dilna siam a ni a. Heng bakah hian he rel kawng hi Mizoram chhim tawp thleng leh chhim lam leh khawthlang lam pawh thleng tura hmalak belh a nih theih nan ruahmanna an chhawp te enho a ni a. Hemi hi puitlin theih a nih chuan tuikawng hmanga insumdawntawnna pawh a remchan phah zual tur thu a sawi.

Anshul Gupta, General Manager, Northeast Frontier Railway (Construction) chuan Bairabi – Sairang New Line Project an siam dan tlangpui leh dinhmun te presentation a pe a.

Pu Rahul Mithal, Chairman and Managing Director of RITES Ltd. hmasawnna ruhrel hrang hrang (infrastructure development) ah ram chhung leh ram pawn thlenga hnuhma an lo neih tawh thu te, sawiin, chuan Mizoram nen thawhhona tha tak neih ngei a beisei thu a sawi a ni.

MoU hi Mizoram sawrkar aiawhin Pu Lalmalsawma Pachuau, Planning & Programme Implementation Secretary in a sign a, RITES atangin C. L. Shah, General Manager (Traffic) chuan a sign. Witness ah Pu K.T. Beicho, Commissioner & Secretary, Transport Dept. leh J.C Das, Sr. Dy. General Manager ten an sign bawk a. Chief Secretary Dr. Renu Sharma chuan lawmthu sawiin hun a khar a ni.

RITES Limited hi Miniratna (Category - I) Schedule 'A' Central Public Sector Enterprise (CPSE) niin, kum 1974 khan Ministry of Railways, Govt. of India hmalaknaa din a ni.