657/2022-2023
Lunglei the 27th May 2022 : Vawiin khan District Sericulture Office, Lungleiah High Powered Committee, Lunglei bultum in Eri Development Scheme hmalakna in Silk Pangang vulhna tur insak dan training neih a ni.

Training hi Pu S. Lalrintluanga, Sericulture Promotion Officer, Lunglei in a kaihhruai a, thusawiin Lunglei District in Silk Pangang vulha kan lo hlawhtlin theih nan leh eizawnna a kan hman theih nan High Powered Committee, Lunglei bultuma hmalak a ni hi lawmawm a ti a. Silk Pangang vulh tura thlanchhuah an ni hi a lawmpui bawk a ni. Silk pangang vulh hi mi taima leh rinawm tan chuan eizawnna tling tak a ni, a ti a, a vulhna tur in chu mithiamte duan ang a sak a, a chhung chu thianghlim thei ang ber a enkawl bawk tur a ni, a ti a, Lunglei District chhunga Silk Pangang khawi lam a hmahruaitu leh HPC kawngsat hawngtu ni theuh turin beneficiaries te a chah a ni.

HPC hmalakna a Silk Pangang khawiturte hi Lunglei District chhunga khaw hrang hrang atangin mi sawm (10) thlanchhuah an ni a, Silk Pangang vulhna tur insaknan cheng singsarih leh sangkhat zanga niin vawiin a training te hnenah hian cheng singruk an pe a ni. Pu R. Lalremruata, Sericulture Inspector, District Sericulture Office, Lungleiin Power Point hmangin Silk Pangang vulhna tur insak dan training hi a pe a ni. Zawhna leh chhanna hun hman a ni bawk.