Chief Minister Pu Lal Thanhawla leh a Council of Ministers ten 13th Finance Commissiom Member-te Civil Secretariat Conference Hall, New Capital Complex-ah meeting pawimawh tak an neihpui.

 

 

Chief Minister Pu Lal Thanhawla chuan Finance Commission member-te lawmna thu a sawiah, hmasawnna lama la pachhe tak, Mizoramin hma a sawn chhoh zelna turah thui tak chu an thutlukna turah a innghat a ni a ti a. Chuvangin, kan mamawh kan rawn thehluh tur hi uluk taka min lo en sak turin ka ngen che u a ni a ti a. A sawilan hmasak berah, Chief Minister chuan ram hausakna insem chungchangah state tinte chanvo inanglo lutuk chu rualkhai zawka tih nise a ti a, hmun kilkhawr taka awm kan nih avangin grant-in-aid tihpun nise, Finance Commission hmasa ten grant-in-aid pek dawna thu delhkilh siam tir thin chu tihbo nise, Centrally Sponsored Scheme a state matching share siam ve thin pawh special category state kan nih angin,100% grant ni tawh se, 6th Pay Commission rawtna kan hman ngei theih nan an term chhunga sum kan mamawh tur Rs.2,088.13 crore min pek te, Mizoramah tax lakna tur a tam loh thu sawilangin kan lak ve tawhnaah chuan hma kan sawn viau thu a tarlang a, Goods and Service Tax (GST )lak tum mek chungchangah Mizoram tan chuan thil huphurh awm tak anih thu a sawilang bawk a.

Heng bakah hian Chief Minister chuan kawngpui, lei leh sorkar building-te enkawlna  chungchangah Commission hmasa khan condition a siam chu tih loh nise a ti a, khawpuia tui in tur pek chungchanga harsatna leh kan mamawh te a tarlang bawk a, Ramngaw enkawlna tur sum mamawhte, mipuite bengvar chhoh zel naah,hnathawh reng rengte chu enzui nghal anih tur thu a sawilangin, Mizoram rambuai anih laia khaw khawm avanga kan intodelh thinna kan hloh phah vek avangin kan intundin lehna tur tanpuina pakhatmah kan hmuh loh thu Pu Hawla chuan a sawilang bawk a, Economic a kan intundin hi kan mamawh ber a ni a ti. Heng kan mamawh tur zualpui hrang hrang belhkhawm hi Rs.2,335.02 crore a ni.

Finance Commission Chairman Dr. Vijay Kelkar pawhin thu sawiin, Commission terms of reference anga kaltur an nuh thu a sawi hmasa a. Sum lama khawvel thachhe mek hian India economy pawh a rawn nghawng tan avangin uluk taka enthlak reng anih thu a sawi a. Dr. Kelkar chuan Mizoram chu mihring enkawlna ah hma kan sawn thu tarlangin, mimal tin dehchhuah chu rampum huap chawhrual aiin a tlem zawk a ni a ti a. Eizawnna hna neilo leh private investment beitham a tih thu a sawi a. Special category states zingah Mizoram chu central fund hmu tam ber, mahse mahni a sum lakluh nei tlem ber a ni a ti a. Kum 2005 atanga VAT hlawhtling taka in hmang tan kha  kan lawmpui che u a ni a ti a. GST hman tur chungchanga in huphurhna te pawh kan hria a, kan ngaih tuah mek a ni a ti. Interest payment lamah ti tha min ti a, power leh road transport lamah hloh thahnem tak Nizoramin a neih thu a tarlang a. Revenue surplus kan vawng reng thei chu fakawm a tih thu a sawilang bawk a. Mizoram sorkarin inter governmental fiscal arrangements a sawilang hi ngaih pawimawh ah kan nei ang a ti a. Calamity Relief Fund, National Calamity Relief Fund leh Pay Commission hmanin State sum dinhmun a khawih tur te an hriat thu a sawi bawk a ni. Dr. Kelkar chuan Mizoram sorkar in an lo dawnsawn danah lawmthu a sawi nghal a ni.

Meeting ah hian Parliamentary Secretary, Chief Secretary leh Secretary te an tel kim hle a ni.