Aizawl Forest Development Agency leh Durtlang PC Synod Hospital tangkawp buatsaih Maubawk leh Lawipui ah te a thlawna inentirna leh a thlawna damdawi semna hlawhtling tak vawiin khan neih a ni a. He programme-ah hian Durtlang Hospital atangin Dr. Linda leh Dr. Thartei te kaihhruaina hnuaiah Technician, Nurse, Pharmacist leh khawl changkang tak takte an thawk chhuak a, tin, Aizawl Forest Division atangin Pu L.Murray, DFO, Pu Lalfela, R.O. leh Staff ten an tawiawm bawk.

Lawipui-ah  hian in entirna chu Community Hall, Aizawl Forest Division in an sak sak hmunah neih a niin damlo mi 170 chuang hnenah damdawi chi hrang hrang a thlawnin sem a ni a, tin, zun, thisen exam, X-ray mi engemaw zat tih sak an ni bawk.

Maubawk-ah pawh hetiang tho hian damlo mi 200 chuang enkawl an ni a, hetiang in entirna leh damdawi mamawh a thlawn liau liau a pek an ni hi Maubawk leh Lawipui mipui aiawhin an VCP ten lawmthu an sawi a ni.