3447/2022-2023

Aizawl, 01.02.2023: Chief Minister Pu Zoramthanga leh Ministry of Defence hnuaia National Defence College Faculty leh Course Member te, ni nga cham tura Mizoram lo tlawh mek te chu CM office conference hall-ah vawiin khan an inkawm.

Chief Minister chuan sipai officer 18 te chu lawmna thu sawiin, Mizoram an cham chhungin hun hlawk thlak tak an hman a beisei thu a sawi a. Mizoram chu defence thlirna atang pawha hmun pawimawh tak a nih dan te, history atanga thlir pawhin rei tak rambuai atanga remna leh muanna tluantling nei ta kan nihna chu thil chhinchhiah tlak tak a nih thu te a sawi a. Thenawm ramte nena inlaichinna kawngah Mizoram pawimawhna te an sawiho bawk a ni.

Maj. General Hari B. Pillai chuan, National Defence College chuan Chief Minister hnenah hian National Security & Strategic Course zir mek India sipai officer te leh India ram thian tha ram dang paruk atanga sipai officer kal khawm te chu Mizoramin tha taka a lo dawnsawn avangin lawmthu a sawi a. Mizoram an hmuh dan hrang hrangte an sawi bawk a ni.

National Security and Strategy Course zir tur hian India sipai, Army, Navy leh Air Force atangte leh India thian tha Foreign ram sipai, Colonel leh a chunglam chinte thlan thin an ni a. Tunah hian he Course zir mekte hi team pasarihah inthendarhin India ram hmun hrang hrang an fang mek a, India rama hnam hrang hrangte nunphung leh hnamziate zira, mipui nunphung hre tura rawn zin an ni.