Nimin tlai khan Chief Minister Pu Lal Thanhawla chuan a chenna Bangla-ah North East Frontier Railway(NEFR) General Manager(Construction) Pu NK Prasad leh a thawhpuite a kawm a. Mizoram chhunga Relkawng phah mek chungchang a sawipui.

Chief Minister Pu Lal Thanhawla chuan Pu NK Prasad leh a thawhpuite chu an hmalak mekah an theihtawp an chhuah nia a hriat thu sawiin sawrkar leh mipuiin an thlawp tlat thu a hrilh a. Thahnem ngai taka hna an thawh avanga lawmthu hrilhin  an hnathawh pawh a sawt hle nia a hriat thu a sawi a;  uluk taka an hnate chhunzawm zel turin a chah a ni. Bairabi to Sairang Rel kawng bakah Indo-Bangla Border Trade point pawh tur, Sairang to Kawrpuichhuah Relkawng leh KMTTP kawngpui pawh tur, Kawrpuichhuah to Lawngtlai Relkawng chu Mizoram tan mai bakah India tan sumdawnna kawng pawimawh tak a nih tur thu a sawi a. Tuna an hmalak mekna relkawng siam chu chak zawka thawh a nih theih nan Mizoram sawrkar pawh a inhawng reng a ni a ti.

NEFR hotute chuan Bairabi to Sairang relkawng siam mek a lei verh tur 23 zinga 22 chu an verh tlang tawh tih sawiin harsatna dang an tawklo a nih chuan Kum 2020 March thla chhungin Bairabi atanga Kawnpui thleng relkawng an phah zawh hman tur thu an sawi a; Kawnpui to Sairang Relkawng pawh Kum 2020 December thla chhungin an phah zo hman dawn niin an insawi a ni. Km 272 a thui, Sairang to Kawrpuichhuah relkawng siam dan tur pawh zirchianna an neih tawh thu leh Survey pawh zawh a nih tawh thu an sawi a. Kawrpuichhuah to Lawngtlai Relkawng project pawh bawhzui thuai a nih tur thu Chief Minister chu an hrilh a ni.