Chief Minister Pu Lal Thanhawla kaihhruaina hnuaiah vawiin khan a office Cabinet room-ah Oil India Limited (OIL) hotute nen OIL hnuaia tualchhung thalaite chhawr an nih theihna tura training pek dan tur an sawiho.

Chief Minister Pu Lal Thanhawla hian Mizorama hmasawnna hna thawka company rawn lut ten, an hnuaia tualchhung mi a tam thei ang ber chhawr thin tura alo tih tawh thin angin, OIL hian tualchhung thalai chhawr theih an nih theihna tura training siam sak hmasak dan tur an sawiho a. An hotupa Pu A.N.Borthakur, Head Geosciences, NEF, OIL chuan India rampumah trainingna in (institutions) pathum OIL in a neih thu sawiin, henga training tura thlan chhuahte chu Corporate Social Responsibility atanga senso zawng zawng, kal man tiama an tum sak thin a ni a ti a. Hnathawh dan kalphung bik leh inenkawl dan bik an neih thu a sawi bawk a. OIL hian an hnathawhna reng rengah tualchhung mite hmasawnna tur an ngaihpawimawh hmasak bik thin thu a sawi bawk a. Hetiang training pek tur hi skill development nen inzul tak anih avangin hemi lama mawhphurtu bikte pawh meetingah hian an tel a ni.

Meeting-ah hian OIL in Keifanga an hnathawhna hmun tur panna kawngpui BRTF siam tura sum pawh an deposit vek tawh chungchang pawh BRO hotu telve te nen an sawiho bawk a ni.

OIL hian Mizoramah Corporate Social Responsibility hnuai atangin vantlang tangkaipui tur engemawzah a thawh tawh a.Chung zingah chuan Aizawl Civil Hospital tan Ambulance, Chaltlang Branch YMA Community Hall sak nan Rs.2.94 lakhs, Serkawn Christian Hospital tan Ambulance, Serchhipa state level badminton competition buatsaih nan Rs.1 lakh leh Aizawla inter college football tournament buatsaih nan Rs.2 lakhs te an lo thawh tawh a ni.

Meeting-ah hian Pu Lalthanzara, Minister of State for Health Services, Pu Lalrinmawia Ralte, Minister of State for Labour, Employment & Training, Pu Joseph Lalhimpuia, Parliamentary Secretary for Industries, Pu T.Sangkunga, Chairman, Mizoram Youth Commission leh Pu Lalram Thanga, Principal Secretary to Chief Minister te an tel a ni.