Vawiin khan Chief Minister Pu Zoramthanga hovin Mizorama tuialhthei laichhuaka thawktu Oil and Natural Gas Corporation Ltd. (ONGC) leh Geology & Mining leh Power & Electricity Department hotute chuan CM Cabinet Meeting Room-ah ONGC hmalaknate an thlirho.

He meeting-ah hian ONGC te chuan 1971-74 atanga Photo-geological mapping an lo tih atanga vawiin thlenga Mizorama hna an lo thawh tawh dante sawiin, tun dinhmunah chuan kawng mumal awmloh avanga an hnathawhin duhthusama hma a sawn theihloh thu te Chief Minister hnenah hian an thlen a ni.

ONGC hian corporate social responsibility (CSR) hnuaia cheng 1.4 crores bawr vel sengin vantlang tana tangkai tur hrang hrang siama hma an lo lak tawh thu tarlang bawkin, hemi zingah hian Kolasib District Jail atan cheng nuai 3.24 an pek te, Bethany Rehabilitation Centre atan cheng nuai 1.54 an pek te, Hualngohmun a ruahtui khawlna atan cheng nuai 10 an sanction te, Serchhip District a A&M Grandchild School building sakna tura cheng nuai 10 an sanction leh adangte a tel a ni.