Nimin tlai khan Chief Minister Pu Lal Thanhawla chu National Commission for Women (NCM) Member, Hmarchhak enkawltu Pi Rekha Sharma chuan a chenna in CM Bangla ah hmuin hmeichhiate dinhmun chungchangah thil hrang hrang a sawipui a, inkawmhonaah hian Mizoram State Commission for Women, Chairperson Pi Vanlalawmpuii Chawngthu, MLA leh Commission Member Secretary Pi Lalbiakkimi te pawh an tel a ni.

Pi Rekha Sharma chuan Mizorama a cham chhunga Mizorama hmeichhia te dinhmun a zirchian thu leh hmeichhe pawl hrang hrangte nen inkawmhona hun tha tak neiin an dinhmun chawikanna atana thil pawimawh an sawiho te, hmeichhe lungin tang leh humsual dai leh vanduaina tawk hmeichhia te enkawlna protective home a tlawh thu te Chief Minister a hrilh a. Ramchhung hmun dang khaikhinin Mizoramah hmeichhiate dinhmun chu a tha zawk nia a hmuh thu a sawi a, nihmahsela inrebawlna a bik takin State chhunga inrelbawlna sang ber Assembly leh inrelbawlna dangah te hmeichhia aiawh tun aia an tam a pawimawh a ni, a ti a. Chief Minister chuan tun aia hmeichhe MLA tam zawk neih chu mimal tak pawha tha a tih thu sawiin hemi atan hian kan ngaihtuahna, rilru puthmang leh sukthlek te siamtha a, khawtlang ang pawha hma lakna a awm a pawimawh a ni, a ti. Pi Rekha Sharma hian Mizo hmeichhia te thawhrimna, an taihmakna leh chhungkaw tana an inpekna chu fakawm a tih thu a sawi bawk.

Chief Minister Pu Lal Thanhawla pawhin Mizorama hmeichhiate dinhmun chawikanna atan Sawrkarin hmalakna a neih dante hrilhin khawtlang inrelbawlna Village Council tinah seat awmzat atangin pakhat tal emaw, a aia tam pawh hauhsak an nih thu te a hrilh a, Aizawl Municipal Council ah pawh hmeichhia te tan seat hauhsak an nih thu a  hrilh bawk. Pi Rekha Sharma chuan police force ah hmeichhia an tlem chu a ngaimawh thu sawilangin hmeichhia te himna ngaihtuahin tun aia tam zawk hmeichhe police an awm a tul tiin hei hian hmeichhia te himna kawngah nasa taka a puih a beisei thu a sawi.