Pu PC Zoram Sangliana, Kolasib Bialtu MLA chuan vawiin dar 10:30 khan Project veng a stadium sak mek tlawhin an hmalakna te a enpui.

MLA hi NBCC a Project Director chuan lo dawngsawngin an hmalakna te a hrilhfiah a.  Pu PC Zoram Sangliana chuan Stadium sak mek chu a lungphum an phum ni a a kal bak a vawikhat tlawh lehna a nih thu sawiin, thangthar te tana ro tling tur Stadium tha tak sak puitlin nise tih chu a duhthusam a nih thu a sawi a. Hetiang a nih laiin hnathawktuten harsatna an nei tih a hriat avangin tanpui theihna a nei em tih hriat a duh vang a nih thu a sawi a. NBCC hotute chu harsatna an neih te ziak a a hnen a hrilh hre tura chah in, a theih ang anga lo bawhzui sak a inhuam thu a hrilh a ni.

NBCC hotute chuan harsatna an neih ber chu a hun taka fund an hmu thin lo chu a nih thu sawiin Utilization Certificate (UC) an thehluh hnuah pawh pawisa an dawn mai theih loh thu an sawi a.  Tunah hian 67.87% physical hna an zawh tawh laiin fund hi 22. 68 crore atangin 9.29 crore chauh an la dawn thu leh, UC an pek tawh chinah pawh 5.5 crore dawn loh an la neih thute, an supplier te hnenah pawisa an pek theih loh avanga supplier tur an hmuh that theih loh thu an sawi a ni.

MLA hi Pu Albert Vanlalliantluanga, DUDO Kolasib bakah KDFA hotuten an tawiawm a. KDFA hotute hian Galery hnuai a ruak a dah mai mai tur chu kawngka siam a, player te accomdate na tur atana chei bawl an duh thu sawiin Bialtu MLA chu hmalakpui turin an ngen a ni