Nimin khan Chief Minister Pu Lal Thanhawla chu India National Badminton Chief Coach Pu P. Gopichand chuan a chenna in CM Bangla ah a hmu a, Mizorama Badminton zirna hmunpui din a duh thu sawiin hemi chungchang hi zau takin an sawidun. Inkawmhonaah hian Aizawl DC Pu Kannan Gopinathan, Tata Trusts aiawh Pu Anant Datlia bakah Mizoram Badminton Association hruaitute an tel a ni.

Chief Minister Pu Lal Thanhawla, Pu Gopichand leh Tata Trusts aiawh Pu Anant Datlia te hian Mizorama Badminton zirna hmunpui Centre of Excellence din anih theih nana thil pawimawh ruahman lawk ngai te, ram pek chungchangte, thawhhona thutlung ziah chungchangte, Sawrkar leh Tata Trusts atanga thil tih theih leh ruahman turte leh tul dang nia a hriat te chu zau takin an sawiho a. He hunah hian Pu Anant Datlia chuan Chief Minister chu Tata Trusts tirha Germany a football zir mek Mizo naupangte chanchin leh hma an sawn dawn te hrilhin an hmasawnna chakin, beiseina sang tak kan nei a ni tiin a hrilh a ni.

Badminton hmunpui atan hian Sihphir a ram en a ni tawh a, he ram hi Village Council pawhin hman rem an ti a. Nimin zing khan helai hmun hi an enfiah nghal a ni.