Vawiin khan Tuirial bialtu MLA Pu Hmingdailova Khiangte, Parliamentary Secretary chuan Hortoki khua a tunhnaia Tlawng lui lianin a tihchhiat te a hmunah kalin a enfiah.
Bialtu MLA chuan Village Council te hnenah chhiat tawk te chu an chhiat tawh dan kimchang taka report la khawm tura hrilhin; Sorkar atanga tanpuina awm thei ang ang te ngaihtuahpui an nih tur thu a sawi a. A mamawh zual te hman atan Silpauline 15 a pe nghal bawk.
Tunkar Thawhtanni 12th June, 2017 a Tlawng lui lian avang khan Hortoki-a chhungkaw 420 te eizawnna ber, Tlawng kam Nul, Leilet-a thlai leh Buh chinna hmun 35 Ha. a zau chu a chim chhe vek a; Tuikhhuah pawh 55 vel a chhia niin hriat a ni. Tlawng kama huan nei te hi an thlâm te pawh lui lian hian a laksak vek avangin thlai chi chin mai tura an dahkhawm te pawh an chan vek a ni.
Hei bakah hian Hortoki khaw chawmtu, Khawzasiaka lui tui lakna Pipe line pawh lui lian hian a len chhiat avangin harsatna an tawk mek a; siam that anih hmaa mipuiin tui thianghlim an neih theihna turin PHE Department chuan khaw bul hnaia Lunglak lui an tih atanga lak tumin an buatsaih mek a ni.
MLA hi EE, PHED Kolasib; SDO(Civil) Kawnpui; SDO PWD Kawnpui leh SDO PHED bakah Hortoki VC ten an tawiawm a ni.

Attachment

  • Loading attachment...