Indian Badminton Team Chief National Coach Pullela Gopichand chuan vawiin khan Aizawl a rawn thleng a, Lengpui Airport-ah Mizoram Badminton Association (MBA) hruaituten an lo hmuak a ni. Zan hnih riak tura lo zin Pullela Gopichand chu vawiin chawhnu dar 3:00 khan Secretariat Conference Hall-ah sawrkar hotute a kawm nghal a, meeting hi Pu Hmingdailova Khiangte, Parliamentary Secretary,Sports and Youth Services Department-in a kaihruai a ni. 

Pu Pullela Gopichand chuan thu sawiin, Gopichand Badminton Academy bul tan chhoh dan leh an hmalakna hrang hrang kalkhawmte a hrilh a. Infiamna lama hlawhtling tur chuan tumruh leh taimak a tul thu sawiin, infiamna hian khawtlang nunah thil tha tam tak a hring chhuak, a ti. Gopichand chuan sports discipline hrang hrangah Mizo ten hma an sawn nasa a, a bik takin badminton-ah Mizo thalai tui chilh tam tak an awm avangin an hmabak a eng hle nia a ngaih thu a sawi bawk.

Meeting ah hian Pu Lalrinzuala Pachuau, Jt. Secretary, MBA chuan MBA hmalakna leh Mizoram Badminton chanchin bakah Badminton hmasawnna tura hmabakte Powerpoint Presentation a neih bakah Pu Anand Datta, Head - Sports Portfolio, Tata Trusts, Mumbai pawhin Presentation hmangin Tata Trust Sports thiltum leh Mizorama Badminton hmasawnnana tura hmalakna tur ruahmanna an siamte a sawi a, Grassroot Centre 10 hmanga naupang 600 chuang huam tura ruahmanna bakah Sihphir a Training Centre duan chungchang te a sawi bawk. Pu Zorammuana, President, MBA chuan lawmthu sawiin hun tawp a khar a ni.

Tunah hian Mizoram Badminton Association leh Tata Trusts te chuan thawhhona bultan nan Talent Search Tournament an buatsaih a, Gopichand Badminton Academy-a Mizo naupangte luh theih dan tur leh nakin zela Mizoten coaching lama hma an sawnna tur bakah Grassroots Development te ngaihtuahin hma an la a ni. MBA in a ruahman dan chuan Tata Trust Sports nena tang dunin Mizoram a District hrang hrangah Badminton Grassroots Course kalpui tura hmalak mek a ni bawk. Hemi bakah hian Mizorama World Class Level High Altitude Training Centre din dan tur pawh ruahmanna kalpui mek a ni a, Sihphir khaw kianga hmun tur ruahman pawh Gopichand ho hian 17/06/2017 ah an en dawn bawk a ni. Chu hmalakna chu chak taka kalpui niin, he mi kawnga MBA finchhuaha puitu Mizoram sawrkar Chief Minister Pu Lal Thanhawla, Sports Minister Pu Zodintluanga leh Sports Department a hotute bakah Aizawl Bawrhsap Pu Kannan Gopinathan chungah MBA chuan lawmthu an sawi a.

Vawiin meeting ah hian Sports and Youth Services Department, School Education Department, Mizoram State Sports Council hotute leh Aizawl Bawrhsap Pu Kannan Gopinathan, IAS bakah Mizoram Badminton Association leh Tata Trust aiawhte an tel a ni.

Pullela Gopichand hi November ni 16, 1973 a piang niin, tunah hian India Badminton Chief National Coach a ni mek a ni. Kum 2001 khan All England Open Badminton-ah a champion a, Prakash Padukone hnua India mi champion leh thei hmasa ber a ni. India coach a nih bakah Gopichand Badminton Academy lar tak a enkawl a, he Academy atang hian khawvel huapa player lar an chhuak teuh tawh a ni. Kum 1999 khan India infiammite chawimawina sang Arjuna Award a dawng a, kum 2009 ah Dronacharya Award a dawng leh a, kum 2014 ah India rama civil mite chawimawina sang tak Padma Bhushan a dawng leh a ni. Olympic a medal la phak khawpa badminton player tha te chher chhuaktu an ni.