7th HPC Inter-Village Cup 2017 Thumluaia Muala inkhelh mekah, vawiin chawhnu khan Sports & Youth Minister Pu Zodintluanga chu a kharna inkhawmah Khuallian niin a hmanpui.

Pu Zodintluanga chuan Mizo mipuite infiamna khawvela min tihming tha turin infiamna ruhrel tha Lunglei khawpuiah kan rawn chhawpchhuah sak mek che u a ni a ti a, hmang tangkaia khawvela Mizote tihmingtha turin Lunglei thalaite chona a siam a ni. Khuallian chuan Thuamluaia Mual mawihnai taka a hnungna tur leh pavilion-a inthiarna changtlung zawk a awm theih nan, sawrkar chuan kumin budget-a pawisa a dah thu a sawi a ni.

He kharna inkhawm hi Pu Jimmy L. Sailo, President LDFA chuan a kaihruai a. Lunglei District Congress Committee (LDCC) President Pu Lalhmingliana chuan Lunglei High Powered Committee (HPC) aiawhin thu a sawi a ni. Pu Zothanzuala Hnamte, Honorary Secretary, LDFA chuan report leh lawmthu sawina hun a hmang a ni.

Pu T. Vanlalhluna, MFA Executive Member chuan Asian Football Confederation (AFC) hnuaia Coaching D-Licence hmu thar – Pu H. Hmingthansanga, Pu H. Zothanpuia leh Pu Lalawmpuia Fanai Zotlang te hnenah certificate hlanna hun a nei bawk a ni.

7th HPC Cup-ah hian Village Council hrang hrang aiawhin team 35 an tel a. Final-ah hian Electric Veng leh Rahsi Veng te intumin, Electric Veng hian 4-1 in hnehna an chang a ni. 

Attachment

  • Loading attachment...