Chief Minister Pu Lal Thanhawla leh Reserve Bank of India (RBI) Governor Dr.Raghuram G. Rajan ten RBI Sub Office Dawrpui Veng K.Kapsanga building 3rd floor ah vawiin khan a rualin plaque khuhna pawt hawngin leh ribbon aruala chep chatin an hawng.

Hawnna inkhawm tawite office chhunga buatsaihah Chief Minister chuan hun rei tawh tak atanga Mizoramin kan lo beisei tawh, tihpuitlina a awm ta hi Mizo mipuite tan vanneihna ropui tak a ni a ti a. Tuna office hawn tak hi hun lokal zel tur thlirin thawktute a dawl zawh loh hun a awm dawn avangin office nghet an neihna tur ram dap sak ala ngai dawn a ni a ti.

RBI Governor pawhin thusawiin, Aizawla RBI office alo awm thei ta chu a lawmawm hle a,hei hian hmasawnna huapzo leh hmarchhak biala inlaichinna tha a thlen ngei a beiseiawm a ni tiin, office lian zawk an la mamawh tur thu a sawilang bawk a ni.

RBI hi sorkar laipui Central Bank a ni a, sum kalphung ngun taka zir rengin central leh state sorkarte thurawn a pe thin a ni. Rampumah Regional Office hi 17 awmin, Hmarchhak state te tan chuan Guwahati ah Regional Office hi a awm a. Hmarchhak state ah a tahtawla sub office hi hawn chhoh zel a ni a. Kum 2011 khan Agartala hawngin, kum 2012 khan Shillongah hawn alo ni tawh bawk a. Sikkimah pawh hawn ani tawh bawk a ni.

Office hawnna inkhawmah hian Chief Minister hi Finance Minister Pu Lalsawta leh Chief Secretary Pu Lalmalsawma ten an tawiawm a ni.

RBI Office hawn hnu hian Legislative Assembly-a Chief Minister’s recess roomah inkawmna hun Chief Minister leh RBI Governorte hian an hmang leh a. Chief Minister chuan Mizo thalaite tan mahnia eizawnna bul an tan theina tura micro financing a tul thu a sawi a. Mizorama Bank awmte hian bul tanna tura loan an pek hreh thin avavngin interest sang tak takin non banking organisation atanga sum an puk thin a ni a ti a. Credit Deposit ratio tha viauin lang mahse, loan an pekna hi motor leinan leh personal loan te a ni ber a, eizawnna tura bul tanna tur loan pekchhuah sawi tur a tlem hle a ni a ti. Thalai zirlaite tan education loan pawh pek an harsat thu sawilang bawkin, zirlai rethei te te te hian Ministry of Tribal Affairs atanga scholarship beitham tak an hmuh hi an innghahna awmchhun a ni a ti. Chief Minister chuan cooperative bank Mizoramin a neih te hi capital tam zawk an neihna turin tan lakpui turin a ngen bawk a. Foreign currency exchange counters te Lunglei leh Champhai ah tal dah thieh nise a ti bawk a. Hmarchhak bial hnufual nachhan pakhat pawimawh tak chu thiamna tlakchham vang leh nachang hriat loh vang a ni tiin, Governor chu thalai zei tak tak te tan professional institution din dan tur ngaihtuah sak turin a ngen bawk a ni.

RBI Governor chuan thalai te tan eizawnna hna an hmuh theih nan leh Bank te nena inlaichhin tha an neih theih nan Banking Recruitment Examination-ah pawh tualchhung mite duhsak zawkna tura ruahmanna siam mek anih thu Chief Minister hi a hrilh a ni.