Vawiin chawhnu khan Assembly Annexe conference hallah Special State Level Bankers’ Committee Meeting neih a ni a, Chief Minister Pu Lal Thanhawla leh RBI Governor Dr. Raghuram G. Rajan ten an hmanpui.

Chief Ministeer Pu Lal Thanhawla chuan Bankers’ Meetinga tel zawng zawng te chu lo lawmin duhsakna chibai a buk a. RBI Governor nilai Mizoram rawn tlawh hmasa bertu Dr.Raghuram G. Rajan chungah lawmthu sawiin, a ni ang mi pawimawh chungchuang leh a thawhpui ten Mizoram an rawn tlawh chu Mizoran tan ni danglam leh lawmawm, ni chhinchhiah tlak a ni a ti a. Mizo mipuite aiawhin lawmthu a sawi a ni.

Chief Minister chuan Mizote hi sumdawnna lam leh sum lakluhnana tura thil siamchhuahna khawl bun turin sum an nei ngailo a ni a ti a. Chuvangin eizawnna bul an tan theihna turin bank atangin micro finance hi a pawimawh hle a ni a ti a.Thalai tam takin mahnia eizawnna insiamchawp an duh rualin bul tanna tur sum bankte hian an puk tir hreh thin a ni a ti a. Mizorama bank awmte hian micro finance scheme an kalpui a tul a ni a ti. Mizoram sorkar flagship programme zauh zelna turahte a pawimawh deuh deuh dawn a ni a ti a. Hmarchhak bial tan a hranpain Micro - Credit Fund NABARD, SIDBI leh NEDFI te tanghoin an din a tul a ni a ti. Mizorama Bank te Credit Deposit ratio hi 42.80 niin, hmarchhak state dangte aia tha zawk angin lang mahse an loan pekchhuah hi motor leinan leh personal loan lam a ni deuh zel a ni a ti a. Bank tam zawkte hnathawh hi mipuite hamthatna tur a thleng phak thinlo a ni a ti.

Chief Minister chuan bankte hian sorkar programme, abikin Prime Minister Employment Generation Programme (PMEG) an ngaihsak tawklo a ni a ti a. Heng bakah education loan pekahte leh Micro Small & Medium Enterprises (MSME) din duha, loan diltute project report an hmawl nasa thin hle a ni a ti a. Chuvangin loan diltuten Project Report ziktluak an thehluh theihna turin ‘Project Guidance Cell’ din turin Bankte a rawn a ni. Chief Minister chuan kuthnathawk mite tana hamthat awm thei Kissan Credit Card te hi a hun tak leh a pawimawhna anga kalpui thin turin banka thawktute chu a ngen bawk a ni.

Bankers’ Meet-ah hia RBI Governor pawhin thu a sawi bawk a ni.

Mizoram tun dinhmunah commercial bank 25 awmin, branch 173 a awm mek a, heng zingah hian He Bankers’ Meeta Convenor,State Bank of India (SBI) hian branch 68 an nei a ni.