Zan hnih chama lo zin Sorkar Laipuia Ministry of Information & Broadcasting-a Secretary, Pu Uday Kumar Varma, IAS chuan nimin chun khan Larsap Pu Vakkom Purushothaman leh Chief Minister Pu Lal Thanhawla te chu an chenna inah te hmu in , inkawmna hun tha tak an nei.

Chief Minister Bangla-a Chief Minister nena an inkawm naah Pu Uday Kumar Verma chuan MZU Campus chhunga IIMC, Aizawl Centre dinna atana ram rang taka tihfel a ni chu Mizoram Sawrkar leh Mizoram University chhungah lawmthu a sawi a. IIMC sakna tur sum chu tihfel vat anih tur thusawiin, a hmunhma leh building sak turah te Mizo zia pholan nise tih a duh thu Secretary hian a sawi bawk.

Pu Lal Thanhawla chuan All India Radio leh Doordarshan Kendra, Aizawl te transmitter a hlui tawh thu te; DDK Aizawl in khawl lamah tihchangtlun an mamawh thu te; Lunglei a Doordarshan Production Centre din a tul thu te Secretary hi a hrilh a. Secretary chuan Transmitter te chu Ministry of I & B chuan upgrade a tum thu sawiin Production Centre din chungchangah pawh kawng awm thei a lo zawn tur thu a sawi bawk a. Secretary chuan programming leh content chungchangah DDK Aizawl chu Hmarchhak DDK Kendra te zingah a titha pawl a ni tiin an khawlte tihchangtlun tum anih thu Chief Minister hi a hrilh bawk a ni.

Chief Minister chuan transmitter chak leh thar te chuan Mizoram pum a tuam tha thei dawn a, ram dang leh state dang ramri hrula cheng Mizo hnahthlak tam tak ten pawhin hemi kaltlang hian Mizo programme radio leh tv kaltangin an ngaihthla in an en thei dawn a, hei hian inunauna tha zawk a thlen thei thu Secretary hi hrilh bawk a ni.

Pu Uday Kumar Verma hian January ni 25 khan Aizawl a lo thleng a, hemi ni vek hian IIMC Aizawl Centre dinna tur ram a en a; PIB Media Centre, Aizawl-ah Central media unit hrang hrang te a kawm hnu in All India Radio Station a tlawh nghal bawk. January ni 26 khan DDK Aizawl Kendra a tlawh a, DDK Aizawl Kendra a hnathawk ten harsatna hrang hrang an tawh leh an mamawh te chu Secretary hnenah hian an thlen a ni.