Vawiin tlai khan Chief Minister Pu Lal Thanhawla chu Ministry of Home Affairs-a Special Secretary Pu M.K. Singla, IPS chuan a chenna inah hmuin Bru(Reang) raltlan te Mizorama hruai kir (repatriation) nan a Ministry of Home Affairs in hma lakna neih dan te hrilhin hemi chungchangah hi an sawiho a ni.

Special Secretary Home Pu Singla chuan he thila Mizoram Sawrkar a bik takin Home Department ten uluk leh chhipchhair taka repatriation programme an duan chu tha leh fakawm a tih thu Chief Minister hi hrilhin Home Ministry chuan Bru raltlan te Mizorama an lo let leh theih nan theihtawp a chhuah mek tih a sawi a ni.

Chief Minister chuan Bru mipuite chuan Mizoram lo kir leh an duh a mahse an hruaitu thenkhat kawhmawhbawl ching leh repatriation tithuanawptu ten harsatna an siam thin avangin a hlawhchham fo tih Special Secretary hi a hrilh a ni.