Vawiin khan Chief Minister Pu Lal Thanhawla chuan Legislative Assembly a Chief Minister's Recess Room ah RBI Regional Office, Aizawl hotulute leh Bank hrang hrang aiawhte kokhawmin pawisa thi leh demonitization in mipuia nghawng a neih dante sawipuiin he thilah mipuiten tan theihtawp chhuaha an harsatna tawh mekte sutkian sak nan thawk turin a chah a ni. Meeting ah hian Finance Minister Pu Lalsawta, Finance Commissioner Pi L. Tochhong leh Finance Department hotute an tel a ni.

Chief Minister Pu Lal Thanhawla chuan demonetization chu ruahmanna tha anih thusawiin a kalpui danah erawh harsatna enge engemaw a awm a, duh angin inpuahchah tha a awm lo nia a hriat thu a sawi. Bank aiawh ten pawisa thar an hmuh that thu hrilhin mipuiten he thila harsatna an tawh mek tiziahawm nan rim takin theihtawp an chhuah mek thu an sawi a. Chief Minister chuan Krismas vuakveta mipuiten, abik takin thingtlang lamah cheng ten harsatna an tawh loh nan theihtawp chhuah turin Bank aiawh te a chah a, chutih rualin dawrkaite leh sumdawngte te pawh electronic clearing te, e- payment leh swipe machine te hmang uar turin a chah bawk a. Demonetization kaihhnawiha midang, abik takin state pawma miten account hawh an dil emaw, an account ah pawisa dah an dil emaw te chu dan kalh anih avangin hetiang inhnamhnawih lo turin leh heng thilah hian mipuite fimkhur turin a chah a. Bank hrang hrang aiawhte pawh benami transactions lakah fimkhur tura chahin an dawrtute pawh hetiang thila inhnamhnawih lo turin zirtir zel turin a chah bawk a ni.

Chief Minister Pu Lal Thanhawla hian Demonetization chu thil tha a nih thu leh hei hian black money a nuaibo theih thu ziakin Prime Minister Pu Narendra Modi hnenah a thawn tawh a, hemi rualin Mizoram chu state kilkhawr anih avangin currency note thar chu RBI in phal bak pawh Mizorama pe turin a ngen a. Hemi avangin hian bank lamah pawh currency note thar hi a thleng tha a, harsatna lian tham a awm lo a ni.