Vawiin chawhnu khan Bru lakna letna kalpui turah venhimna kalpui dan tur te rawn zirchianga Mizoram rawn tlawhtu Pu M.K. Singla, Special Secretary( Internal Security), Ministry of Home Affairs, GOI chuan Chief Secretary Pu Lalmalsawma chu a pisa-ah kawmin Bru Repatriation chungchanga sawrkar hmalaknate a sawipui .

An inkawmna ah hian Pi Renu Sharma, Commissioner & Secretary, Home Department, Pu Thianghlima Pachuau, DGP, Brig. Uday Pathania, DIG, BSF, Brig. M.S. Mokha, DIG, AR leh Home Department Official te pawh telin Bru Repatriation kalpui tura venhimna kalpui dan tur leh hmachhawp te kimchang taka sawiho a ni a.

Chief Secretary Pu Lalmalsawma chuan Mizoram sawrkarin theihtawp chhuahin ruahmanna a siam bakah Bru raltlante zirchianna pawh Tripura State-a refugee camp zawng zawngah hlawhtling takin a nei tih a tarlangin Mizoram sawrkar chuan a tihtur tul te a tih tawh thu MHA Secrectary hi a hrilh a. Pu M.K. Singla, Special Secretary, MHA chuan Nakum January thla ah chuan Bru Repatriation hi chinfel a nih tawh ngei Central Sawrkar leh Mizoram State chuan a duh tih sawiin tunhmaa hmalakna te a lo hlawhtling pumhlumlo mahse tuntum a Mizoram sawrkar inpuahchahna chu a tha thawkhat nia a hriat thu a sawi a. State leh Central hmalakna bakah thawhho dan tur kawng hrang hrang pawh inpawhtlang taka sawiho a ni.