3325/2023-2024

Dated Aizawl, the 12th January, 2024: Vawiin khan Chief Minister Pu Lalduhoma chuan a pisaah United Kingdom a Mizo Nurse te hna hmuhsak thin Mizoram OET Coaching Hub (MOCH), Charkos Global peng pakhat neitu Pi Lalrinawmi Fanai leh Mary Zothanchami te a kawm.

An insawi danin MOCH te hian Charkos Global UK te nena tang dunin kum khat leh a chanve Mizoramah hna an thawk tawh a. UK a Nurse hnathawk duh mi 19 ten an training buatsaih an pass tawh a, an zinga 14 ten UK ah registered nurse hna thawk mekin, thla khatah cheng nuaih thum vel an hlawh phak vek a ni. Hetianga Nurse hna thawk tura an inbuatsaihna chi tinreng anni hian an ngaihtuahsak a ni.

Mizoram Youth Commission nena inremna siamin MYC hian nurse training in hna a hmuh chuan, sponsor nan cheng singnga an pe thin a. Mahse he an sponsorship hi an tihtawp leh tak avangin harsatna an tawk tih Chief Minister hnenah hian an thlen a, chhunzawm leh turin an dil a ni.

Chief Minister chuan, tunhnaia British Deputy High Commissioner in charge of East India Dr. Andrew Flemming nena an inkawmnaah Mizo Nurse tam zawkte UK a thawn kan rel a, chak taka bawhzui kan remti dun bawk a. Chumi hnathawktu pakhat chu in nih avangin a theih anga tanpui che u hi a that a rinawm a ni, a ti a. An thil dil chinchang hrilhin Mizoram Youth Commission chairman thar tur phone in a be nghal a ni  An hmalaknate chu Mizo Nurse hna zawnglaiten hre zau thei se tha a tih thu a sawi bawk.