Vawiin khan UN Agency pali inzawmkhawm 'UN Joint Initiative in Mizoram' a Agency pali - UNIDO, UNDP, ILO leh FAO aiawh te chuan Chief Minister Pu Lal Thanhawla chu Chief Minister Bangla ah hmuin an hmalak tawhna, an hmachhawp leh an hmathlir te an hrilh.

Chief Minister Pu Lal Thanhawla chuan UN agency pali inzawmkhawmin kuthnathawktu te thiamna tihpunna leh an mahni kawng hrang hranga zirtirna pe tur te, Mizoram a mau tangkai zawk leh hlawk zawka sawngbawla, thilsiamna atana hman leh a kaihhnawih thilsiamna hmunpui bun theihna atan te, leh thalai lehkhathiam ten thiamna bik 'skill development' an neih theihna tura, an dinhmun zirchianga, an mamawh tur 'skills' hrang hrangte zirna dapna kawngah te leh hmasawnna dang atana an rawn thawkchhuak chu lawmawm a tih thu a hrilh a. Mizoram Sorkar chuan UN Team hmalakna tihhlawhtlin anih theih nan kawng engkimah an tawiawm tur thu a hrilh bawk a ni. Chief Minister chuan skill development chu a ngaihpawimawh zual bik ami anih thu sawiin man power planning leh skill development a theitawp chhuahpui turin a sawm a ni.

Pu P.L. Thanga, NLUP Implementing Board Vice-Chairman chuan UN Joint Initiative in Mizoram chuan hun reilo te chhungin Mizoram fangin capacity building atan te, skill development atan te, practical training leh an thawh tur dang atan ruahmanna te an siam tawh thu Chief Minister a hrilh a.

UN Agency pali aiawhte hian a mal malin an Agency hmalak tawhna theuh Chief Minister an hrilh a, an kalphung tur leh an hnatawh dan tur an hrilh bawk a. UN agency aiawhte hetianga inzawmkhawmna chu a hmasaber anih thu sawiin an hlawhtlin chuan Mizoram model hi Hmarchhak dangah pawh kalpui an tum thu an sawi a. Mizorama an hmalakna te chu tun thla chungin DoNER Secretary sawipui an tum thu an sawi bawk.

UN Joint Initiative Team te hi - Pi Ayumi Fujino, UNIDO Representative in India; Pu Guru Koppa, Asst, FAO Representative; Pu Sher Verisk, Deputy Director ILO; Pu Sandeep Tandon, National Expert, Sustainable Development for All, UNIDO; Pu John Borgoyary, Coordinator, North East Region UNDP te an ni a. Anni hi NIB Secretary Pu James Lalrinthanga leh Aizawla UN Initiative Office a thawkten an tawiawm a ni.