Vawiin chawhma dar 10 khan Lawngtlai District Level Vigilance & Monitoring Committee chu an Chairman Pu CL Ruala, MP (Lok Sabha) leh Co-Chairman Pu Ronald Sapa Tlau, MP (Rajya Sabha) hovin DC Conference Hall-ah an thu khawm a. AH & Vety, etc. Minister Pu C.Ngunlianchunga, Fisheries, etc. Minister Dr BD Chakma, CADC CEM Pu Kali Kumar Tongchangya leh LADC EM Pu Chhuanawma te pawh an tel.

Chairman Pu CL Ruala chuan sawrkar laipui report-a a lan danin, Lawngtlai District-ah hna a tha lo hle tih sawiin, hmasawnna hna hrang hrang enkawltute’n tan lak a ngai hle a ni, a ti a. Co-Chairman Pu Ronald Sapa Tlau pawhin tha taka hna thawk thei tur chuan sawrkar hna thawk, NGO leh mipuite inkarah thawh hona tha tak neih a tul a ni, a ti.

Vawiin meeting-ah hian Lawngtlai District huam chhunga sawrkar laipui hmasawnna hna hrang hrang kalpui mekte thlir ho a ni a. Harsatna awmte pawh sawi ho va, a chin fel dan tur leh hma sawn zel dan tur te sawi ho a ni.

Tun dinhmunah PHED hnuaia National Rural Drinking Water Programme (NRDWP)-ah Lunghauka, Dumzautlang leh Boraituli-ah te tui lak hna thawh mek a ni a; Swachh Bharat Mission (Gramin) hnuaiah ek in 492 sak zawh tawh niin, sak mek 57 a awm bawk.

PWD hnuaia Pradhan Mantri Gram Sadak Yojana (PMGSY) kal tlangin kawng 5 (km 40 chuang)-ah hna hrang hrang thawh mek a ni a. Sum lam harsatna avangin duh angin hna a thawh chak theih loh, tih report a ni.

Social Welfare Department hnuaia National Social Assistance Programme (NSAP) kal tlangin tar pension (IGNOAPS), hmeithai pension (IGNWPS) leh rualbanlo pension (IGNDPS) te kalpui mek a ni a. A theih ang angin a mamawhtute tuam kim zawk tura hma lak mek zel a ni.

DRDA kal tlanga hna thawh Mahatma Gandhi National Rural Employment Guarantee Scheme (MGNREGS) hnuaiah kum 2015-2016 chhungin Lawngtlai District-ah ni 62 chhung inhlawhna siam a ni tawh a, ni 10 dang inhlawhna la awm leh tura beisei a ni. Kum 2015-2016 chhung atan Lawngtlai District pumpuiah Job Card 28156 pek chhuah a ni bawk.

Indira Awaas Yojana (IAY) hnuaiah kum 2015-2016 chhung atan in 10 sakna tur sum (1st instalment) hmuh tawh a ni a. IAY dawng tur thlan thu-ah fimkhur a tul thu leh dawng tura thlan tawhte pawh job card-a an hming leh bank account-a an hming ziah dan inang chiah chiah a ngaih thu sawi a ni.

Border Area Development Programme (BADP) hnuaiah Lawngtlai District chhungah hna kal mek 30 a awm a. Backward Region Grant Fund (BRGF) hnuaiah hna thawh zawh tawh 307, thawh mek 6 leh la thawh tur 1 a awm bawk.

Integrated Watershed Management Project (IWMP) hnuaiah Lawngtlai District-ah Project 17 awmin, he’ng project-te hi PIA-te’n an enkawl mek a. He hunah hian hna kalpui zel dan tur pawh sawi ho a ni.

Vawiin meeting-ah hian Health Department hnuaia National Health Mission (NHM) leh P&E Department hnuaia Rajiv Gandhi Gram Vidyatikaran Yojana (RGGVY) kal tlanga hna thawh te pawh thlir ho a ni a. Hma sawnna tur rawtna hrang hrang siam a ni bawk.

He meeting-ah hian Lawngtlai District Additional DC Pu R.Lalsangluaia bakah, DRDA Lawngtlai, PWD, PHED, P&E leh Social Welfare Department hotute, Lawngtlai District chhunga BDO te leh PIA (IWMP) te, NGO hrang hrang ai awhte an tel kim hle a ni.