2822/2022-2023
Aizawl, 26.11.2022: Ni khat cham tura Mizorama lo kal Union Minister of State for Minority Affairs Pu John Barla chuan vawiin tlai khan Chief Minister Pu Zoramthanga chu a chenna CM bungalow-ah hmuin an inkawm.
Union Minister of State Pu John Barla chuan Chief Minister hnenah hian District Council Affairs & Minority Affairs Department leh Social Welfare & Tribal Affairs Department te nena meeting an neih thu leh an thu rel tlangpui a sawipui a. Minority te hmasawnna tur sawrkar laipuiin a ngaihpawimawh thu leh Mizorama hmalakna te an sawiho thu a sawi a ni. Mizoram chhungah minority awm mahse, India ram pum thlir chuan Mizoram a chengte chu minority anga ngaih theih a nih thu te an sawi bawk a.
Union Minister of State chuan minority hrang hrang te hi ram hmasawnaah thawh hlawk tak tak an nih thu a sawi a. Kristian te chu entirnaah hmangin, ram hruaitu langsar tak tak te hi Kristian zirna in atanga zirchhuak an nih thu te a sawi a ni.
