2821/2022-2023 

Aizawl, the 26^th November 2022 : Vawiin tlai dar 4 khan zan hnih riak tura lo zin Union Minister of State for Minority Affairs Pu John Barla hovin Secretariat Conference Hall MINECO ah a Ministry hnuaia hmasawnna programme pawimawh tak Pradhan Mantri Jan Vikas Karyakram(PMJVK) Mizorama kalpui dan leh dinhmun te, thlen chin leh hmabak te leh harsatna leh buaina awm te thlir hovin District Council Affairs & Minority Affairs Department leh Social Welfare & Tribal Affairs Department a hotulu leh officer te review meeting a neihpui.

District Council Affairs & Minority Affairs Department hotute chuan Mizoramin Pradhan Mantri Jan Vikas Karyakram(PMJVK) kaltlanga sum a hmuh zat te, hmasawnna hna hrang hrang thawh mek dinhmun leh project pawimawh zual engemaw zat chanchin te tarlangin harsatna an tawh mek chungchangte a bik takin hna thawk tur Directorate an neih loh te, administrative cost pek an nih loh te, thawktu indaih loh vanga geo tagging lamah an hnufum bik te an sawi lang a ni.

Presentation a ngaihthlak hnuin Union Minister of State Pu John Barla chuan harsatna an tawh mek te chu a thei ang anga Ministry lama Secretary sawipuia chinfel dan kawng a zawnpui tur thu a sawi a. Hetiang harsatna te hi a hmun lokal loh chuan a hriat theih lova tiin a zin chhan pawh harsatna awm te chinfelpui te, project te dinhmun hriatchian a duh vang a nih thu a sawi lang a. Sum a hun taka an hmuh theih nan a hun taka sum hman nemnghehna Lehkhabu UC te chu Ministry lamah thehlut vat thin turin a chah a ni.

Review meeting ah hian Dr. B.D. Chakma, MLA; Secretary, District Council & Minority Affairs Dr. Lalrozama; Secretary, Transport (tunah Social Welfare & Tribal Affairs Link Officer) Pu KT Beichho bakah DC & MA leh SW &TA officer dangte an tel a ni.

PMJVK hi tun hma chuan Social Welfare & Tribal Affairs Department in an enkawl thin a, 2020 atang khan District Council & Minority Affairs Department in he subject hi changin an enkawl tan a ni. PMJVK project lian tham thenkhat thawh mek te chu – cheng nuai 3286.4 man Residential School Mamit te, cheng nuai 3461.70 man Residential School Lawngtlai te, cheng nuai 3430.70 man Residential School Lunglei te; cheng nuai 3286.34 man Residential School West Phaileng te; District Sports Complex Mamit cheng nuai 4496.88 man te a ni. Hei bakah hian ICT Department thawpuinain Smart Classroom, High School engemaw zata dah a ni bawk. Tuidam leh Chawngte a phullem phah pawh hi PMJVK hnuaia thawh a ni.