Nimin (26.6.2017) tlai khan zankhat riaka Mizoram lo zin Sawrkar Laipui Minister of State for Youth Affairs & Sports Pu Vijay Goel chuan Chief Minister Pu Lal Thanhawla chu a chenna in CM Bangla ah a hmu a, Mizoram hmasawnna a bik takin infiamna lama tunhnaia Mizoram hlawhtlinna te Chief Minister in a lo hrilh a, sports hmasawn zel nan theihtawp chhuahpui turin a ngen a ni. 

Union Minister chuan Mizoramin football ah hlawhtlinna a hmuh te chu lawmawm tiin football leh infiamna dangte a hmasawn zel theih nan, a theih ang anga Mizoram tanpui a duh thu a sawi a. Chief Minister in Tata Trusts leh Mizoram Sawrkar thawhhona kaltlangin  Mizo naupang 20 chuangin Germany ah football an zir mek thu te, Badminton a Mizoram tihhmasawn nan tunhnaia India Chief Coach Pu P. Gopichand'n  Mizoram a rawn tlawh thu te leh amah nen pawhin inhmu in Centre of Excellence a din duh amah a sawipui thu te leh India Cricketer lar tak Pu Surinder Amarnath pawhin Mizoram tlawhin Mizorama Cricket Academy a din a duh thu amah a sawipui thu a sawi te chu Union Minister hi a hrilh a. Mizoramin sports ruhrel hrang hrang din tawh leh din mek te chanchin pawh sawilangin sports tihmasawn zel nan theihtawp chhuahpui turin  Pu Vijay Goel a ngen a ni. 

Nimin chawhnu khan Chief Minister Pu Lal Thanhawla, Cricket Association of Mizoram, President ni bawk chuan Union Minister Pu Vijay Goel chu Sihmui a Suaka Cricket Ground a tlawhpui a, thil tul te leh cricket hmasawn dan tur a hmunah hian an sawiho a ni.