Mizoram Governor Lt. Gen Nirbhay Sharma, PVSM, UYSM, AVSM,VSM (Retd.) chuan Union Minister of State for Youth Affairs & Sports  Pu Vijay Goel  chu nizan  khan Raj Bhavan-ah a kawm. He inkawmna hun ah hian Governor chuan Mizoram chungchang hrilhhriatna neiin Mizoram thlen chin leh mamawhte hrilhin theihtawp chhuahpui turin a ngen a ni. 

 Mizoram Larsap chuan Mizoram chu ram nuam tak leh ralmuang tak a nih thu tarlangin Mizote khawtlang nuna thil chhinchhiah tlak takte Minister chu a hrilh a.  NGO hrang hrang leh Kohhran hote hmalakna avangin  boruak muanawm tak hnuaiah inthlanna (Election) neih thin a ni a ti a. Infiamna lama Mizoramin hmasawnna hrang hrang leh tunhnai maia hlawhtlinna a chan te pawh hrilhin Mizoram chuan theihna nasa tak a neia, hemi haichhuak tur hian theihtawp chhuah angai a ni a ti a. Pu Nirbhay Sharma chuan Mizoram chu zin mite hip thei tura hmun mawi leh remchang anih thu sawiin International boundary nei a nih avangin khualzin tam zawk a hip theih dawn thu leh India tan pawh chhuahka tha tak a ni thei a ni a ti a. Ruihhlo laka Mizote an fihlima nun hrisel an neih theihna atan   uar zawka infiamnna leh taksa sawizawi a pawimawha, hemi bawhzuina atan Healthy Mizoram Campaign pawh hawn ani tawh bawk a ni a ti. 

Union Minister of State for Youth Affairs & Sports  chuan  Mizoram-in Infiamna lama hmasawnna duhawm tak a chang chu a lawmpui thu a sawi a. Prime Minister in Sports tihhmasawn a tum thu leh hemi atan  hian budget pawh tihpun a ni a ti a. Pu Vijay Goel chuan Infiamna tih hmasawn zelna tur chuan thingtlang atanga tanin theihna leh thiamna nei te zawnchhuah zel an ni dawn a ni a ti a. Sports tih changtlungna atan Schemes, Scholarship leh Portal te siam a ni a ti bawk. Mizoram chu nuam a tih thu sawiin Inthlanna felfai taka neih ani te, faina,  khawtlang nuna Tlawmngaihna leh YMA te hnathawhte chu fakawm a tiin India ram puma entawna hman nise a duhawm hle ani ati bawk. 

Union Sports Minister hian Nimin lam khan Suaka Cricket Stadium, Sihhmui leh FIFA Football Ground, Sairang  te a tlawh a. Vawiin lamah AR Lammuala 11 Million Football Festival a hmanpui dawn bakah Sawrkar hotute leh Sports Association aiawhte a kawm bawk ang. Hemi zawh hian Mizoram a chhuahsan dawn a ni.