New Delhi a cham mek Mizoram Chief Minister Pu Zoramthanga chuan vawiin chawhma khan Central Sawrkara Road Transport and Highways Minister Pu Nitin Gadkari chu a chenna banglow-ah hmuin Mizoram thil pawimawh a sawipui.

Chief Minister chuan Mizoram ang ruahtui tamnaah alkatra hmanga kawng siam a tlo thin loh avangin cement concrete hmanga kawng siam a that zawk thu te, Mizoram leh hmarchhak economy siamthata tihngheh nan uar zawka mau chin a tul thu leh mau phurh vel nan bamboo link road a pawimawh thu te, Mizoram National Highway tam zawk NHIDCL (National Highways and Infrastructure Development Corporation) kuta pek tum chu ennawn leh a, NH 54 pumpui Lailapur atanga Tuipang thleng bak Highway tenau chu State PWD kuta dah tur leh, parliament inthlan puan hma ngeia Mizoram Highway siamthatna tur estimate te sanction turin Union Minister hnenah a ngen a ni.

Union Minister Pu Gadkari chuan Seling- Champhai khaw kar kawng hmun pahnih te, New Vervek- Tuivai kawng siamna tur leh, Tuivai lei dawhthatna tur te, Airport kawng Tlawng lei dawhna tur leh kawng thenkhat thuamthatna tur chu reilote chhunga sanction tihchhuah mai theih a nih thu a lo hrilh a. Heng hnate hi hmanhmawh thlak an nih avangin, sanction chhuah hma pawha tender lo chhuah mai Pu Zoramthanga'n a dilna pawh a remti a ni. Lunglei-Tlabung road a Phairuangkai Lei leh Durtlang- Sihphir kawng zauhna tur pawh a rang thei anga sanction tura hma lak tum anih thu Minister chuan a hrilh bawk. Cement concrete road leh Highway enkawltu chungchang pawh lo ngaihtuah a tum thu a hrilh bawk. 

Union Minister hi Director General & Spl.Secy leh Chief Engineer ten an tawiawm a. Chief Minister hi Pu Umakant,  Resident Commissioner, Delhi; Pu K. Lalsawmvela, Chief Engineer, PWD leh Pu Lalhmansanga, P.S to CM ten an tawiawm a ni.