Vawiin khan Art & Culture Minister Pu R.Lalzirliana chuan Sumsuih khuaa Sanghnuna Puk hming tlangzarhna hun Pu Saichhunga, Sumsuih Vengthlang In-ah a hmang. Minister hi Aizawl South III Bialtu MLA, Pu F.Lalnunmawia'n a tawiawm a ni.

Minister Pu R.Lalzirliana chuan thu sawiin, hnam tana nunna hlante hriatrengna hun buatsaih a ni chu lawmawm, a ti a. Pi pu nunmawi, tlawmngaihna, huaisenna, hmeithai, pachhiate chhawmdawl kawnga an nunzia theihnghilh loh chu tangtharte hriattur pawimawh a ni, a ti a. Hnam nun chawisangtu, thian chhan thih ngam pasalthate hriat reng leh chawimawi chu kan tih makmawh a ni, tiin a sawi.

Bialtu MLA Pu Lalnunmawia pawhin thu sawiin, Sanghnuna Puk chu puk hmingthang leh tlawhtu ngah tak a nih theihnan khawtual miten mawhphurhna sang tak an nei a ni, a ti a. Hnam tana nun pe leh chante ngaihhlut leh ngaihsan chu hnam upa te tihdan anga chawinung zel turin, kal khawmte chu a ngen a ni.

Sanghnuna Puk hming thlangzarhna hi Sumsuih YMA President Pu Lalduhthlana chuan a kaihruai a, Upa Roliana chuan hunserh hmangin he hun hi Pathian hnenah a hlan a. 

He hunah hian Ex-Minister Pu K. Vanlalauva, Sumsuih YMA, MHIP, MUP hruaitute leh midangte an tel a ni.

Sanghnuna Puk hi Sumsuih hmar lam, Km 3 vela hla-ah a awm a, Sumsuih-ah hian hmun pawimawh dang, Thangzawra Lunglen Tlang, Chhura Hniak leh Neuva Lungphun te a awm a ni.

Attachment

  • Loading attachment...