Vawiin khan DC Conference Hall, Mamit-ah District Task Force On Immunization Committee chu Pu Jacob Lalawmpuia Addl.DC, tuna DC Charge la mek hovin Mamit District chhunga hri danna pek dan chungchangah an thukhawm.

Meeting-ah hian Mamit District chhunga hri danna hrang hrang pek dan tlangpui tarlan niin duhkhawp lohna leh tan lak a ngaihna laite sawiho a ni a. Dr. Lalhlimpuii, Surveillance Medical Officer, WHO Mizoram viltu chuan Report pein WHO Survey, 2018 in a tarlan danin Mamit District chhunga naupang hri danna la kim vek chu 67.7% an nih thu a tarlang a. Kan ramah zenghri te, Zawnghri leh Sakawr-ekhrik natnate umbo vek ni tawh mahse kan thenawm ram, Bangladesh leh Pakistan-ah te umbo a la ni lova, awlsamte a inkaichhawn theih a nih avangin hri danna lak kalpui zel a la tul a ni a ti.

Dr. TC Hmingthangi, District Immunization Officer, Mamit District chuan Kum 2018 chhungin intensified Pulse Polio Immunization (IPPI) Round hnih neih a nih thu a tarlang a. A pumpuiah 98.6% chu hri danna pek chungchanga an hlawhtlinna hmuh a nih thu a sawi.

Meeting-ah hian IPPI 2019 chungchang sawiho niin Booth Camp siam leh nise, kum dang ang bawkin house to house visit neih leh ni bawk se tih a ni a. IPPI launching Programme hi March Ni 12-a neih tura ruahmanna siam a ni.

Mamit District chhunga naupang hri danna la la lo-te chu hri danna beihpuithlak chhunga laktir vek turin DTFI chuan an nu leh pate a ngen a. Meeting-ah hian hri danna pek hma Ni emaw pek dawnah VC emaw YMA aurinna hmangin mipuite hriattirna pek hmasak nise tih a ni bawk.

Vawiin Meeting-ah hian DTFI Member-te an tel tha hle a ni.