Home, Disaster Management & Rehabilitation leh Taxation Department-te changtu Minister Pu Lalchamliana chuan vawiin khan Lunglei a tlawh.

Minister hian chawhma dar 11:30 ah Lunglei a rawn thleng a. 2nd Battalion MAP, Luangmual Pipe Band-in Guard of Honour lo pein Lunglei SP Pu C. Lalthanmawia, 2nd Battalion MAP Commandant Pu Lalmuanpuia, Project Director Pu K. Lalrohlua, Addl SP Pu Lalchhuanthanga leh official dangte’n an lo dawngsawng a ni.

17th February 2019 (Sunday) chawhnu dar 2 vela rial nasa tak a tlak avanga chhiat tawkte chhawmdawl dan tur sawiho turin DM&R Minister ho hian Circuit House-ah meeting neih a ni a. He meeting-ah hian Pi Lalchhanhimi, SDC (in charge DM&R) in report tlangpui pein Lunglei khawpui chhung leh a chhehvel VC 27 atanga report dawn danin Rialin inchung a denchhiat zat chu 2068 niin heng zinga in 948 te chu nasa taka chhia (Major Damage) an nih thu a sawi a.  Rial tlak ni (17th February) atang khan bialtu MLA te kaihhruaina hnuaiah chhawmdawl hna hi kalpui nghal vat niin a mamawhte hnenah silpaulin sem chhuah anih bakah District Verification Team 21 (sawmhnih leh pakhat) din niin heng Team te hi insem darhin Spot Verification an kalpui nghal a ni, a ti. Chhawmdawl hna kalpui tur hian State Disaster Response Force (SDRF) atangin Rs. 49,24,400/- mamawh a nih thu sawiin DM&R Directorate-ah report kim chang thehluh a nih tawh thu Pi Lalchhanhimi chuan a sawi bawk.

DM&R Minister Pu Lalchamliana chuan rial tlak avanga chhiat tawkte thinlung taka a tawrhpui thu sawiin thahnemngai taka chhawmdawl hna kalpui tu sawrkar official-te, tlawmngai pawl te, khawtlang hruaitute leh mipuite chungah lawmthu a sawi a. Chhawmdawl hna kalpui tura sum mamawhte a rang thei ang bera tifel tura hmalak a tum thu sawiin hemi chungchangah DM&R Director Pu FJ Liantluanga phone-a be nghalin ruahmanna a siam pui. An harsatna leh mamawhte dangte inthlahrung hauh lova thlen thin turin Minister chuan kalkhawmte a chah bawk.

Minister hian vawiin vek khan Lawngtlai pan turin Lunglei a chhuahsan leh nghal a. Naktuk (26th February 2019) hian Vathuampui khuaa Mizo Martar Lungphun a hawng dawn a ni. Naktip (27th February, 2019) hian Aizawl panin Lawngtlai a chhuahsan dawn a ni. Minister-hi Aizawl atangin Pu Neihchungnunga IPS, DIG (CID), official dangte leh Party hruaituten an tawiawm a ni.