Vawiin khan Govt. T. Romana College Auditorium-ah ni li awh tur India hmarchhak lemchan leh lam khawmpui (Festival) ‘North East Natya Sangam 2019’ hawnna neih a ni a. Minister of Agriculture, Irrigation etc Pu C. Lalrinsanga chu Khuallian a ni a. Sangeet Natak Akademi, New Delhi bultum niin Art & Culture Department leh Govt. T. Romana College buatsaih a ni.

Minister Pu C. Lalrinsanga chuan hnam rohlu, lam leh lemchan pholanna hun tha tak buatsaih a ni chu lawmawm a tih thu a sawi a. State hrang hrang intlawhpawhna leh thawhhona chuan lungrualna leh inunauna nasa lehzualin a thlen a beisei thu a sawi a. Minister chuan India rama hnam hrang hrang zingah hnam tlem leh te zawkte hian hriat an hlawh lo hle a, India hmarchhaka hnam nunphung leh ziarang phochhuahna atan festival hi a pawimawh hle a ni, a ti a. Zirlaite hnenah chuan rimawi leh lam hi mizote tan chuan kan hnam nihna (identity) in a ken tel a ni a, kan pi leh pute atanga kan rochun a ni, a ti a. Hetiang hun duhawm tak hi zirlaiten tha thei ang berin kan hmang tangkai tur a ni tiin kan hnam nunphung leh ziarang kan hlut thiam a pawimawh hle a ni, a ti a. Khawvel thang zelah thiamna a sang zel a, phone hmangin thil kan hre zung zung thei tawh a, heng hi a tha zawnga hmangin kan talent-te tihpun nan kan hmang thin tur a ni tiin zirlaite a chah a ni.

North East Natya Sangam rual hian ‘National Seminar on Prespectives: Theatre in NE India’ buatsaih a ni a. Mithiam tak tak-Prof. Laltluangliana Khiangte, MZU, Bibhu Battacharjee, Tripura leh Genevieve Khongjee, Meghalaya te paper zir hona neih a ni ang. Sangeet Natak Akademi hi Ministry of Culture hnuaia autonomous body niin May Ni 31, 1952 a din a ni a. India ram chhunga hnam hrang hrang rimawi te, lam te, lemchan te phochhuah leh humhalh hna an kalpui thin a ni.

Govt. T. Romana College hi kum 1992 khan din a ni a, department pariat (8) awmin teaching staff 38 leh non-teaching staff 18 an awm a. Zirlai 1073 an awm mek a ni.

Govt. T.Romana College Principal Dr. Lalrintluanga chuan Sangeet Natak Akademi hotute leh North East state dang atanga lo kalte lawmna thu a sawi a. Dr.Jenifer Lalbiakdiki chuan inbuatsaihna report a pe a. Sangeet Natak Akademi atangin thusawi ngaihthlak a ni a. Festival Coordinator Pu C.Laldinsanga chuan lawmthu sawina in hawnna programme hi a titawp a ni. Hawnnaah hian Sangeet Natak Akademi hotute, Art & Culture Department hotute, Govt. T.Romana College zirtirtute leh zirlaite an tel a. Ni li chhung hian Govt.T.Romana College leh Vanapa Hall-ah Assam, Manipur, Nagaland, Tripura, Sikkim, Arunachal Pradesh, Mizoram atangin lam leh lemchan entir a ni dawn a, paper presentation a awm dawn bawk a ni.