Nimin tlai khan Chief Minister Pu Lal Thanhawla chu Sawrkar Laipuia Ministry of Power a hotu - Joint Secretary Pu A.K. Verma leh Director Pu K. K. Mishra ten a Pisaah an hmu a. Chief  Minister kaihhruaina hnuaiah anni leh Power & Electricity Department Secretary Pu H. Lalengmawia leh Engineer-in-Chief Pu L. Pachuau ten Mizoram kawlpetha dinhmun, mamawh leh kawlpetha semchhuahna tih changtlunna te an sawiin Chief Minister Office-a Cabinet Room ah meeting an nei nghal a. Meeting ah hian kawlpetha leh a kaihhnawih buaipuitu - Power Grid Corporation of India Limited (PGCIL); Rural Electrification Corporation (REC), North Eastern Electric Power Corporation Limited (NEEPCO) leh National Hydroelectric Power Corporation (NHPC) aiawhte pawh an tel a ni. 

Chief Minister Pu Lal Thanhawla chuan thla hmasaa New Delhi a Union Power Minister Pu Piyush Goyal, Mizoram kawlpetha dinhmun a sawipuinaah Mizoram mamawh te a hmun en turin High Level Delegation a tirh thu a sawi bawhzuia High Level Delegation in Mizoram an tlawh chu Minister chunga lawmthu a sawi a. Mizoram power dinhmun leh mamawh te chiang zawka an hriat thei nan leh hemi kawnga chak zawka hma lak ani thei nan Power & Electricity Department te hova meeting neih hian rah tha  a chhuah a beisei tih sawiin meeting ah thu hma a sawi. 

Meeting ah hian Power & Electricity Department, Engineer-in-Chief Pu L. Pachuau chuan Mizoram kawlpetha dinhmun leh mamawh te; power project leh scheme kalpui mekah hna thawh chin, hma bak leh harsatna te presentation hmangin a tarlang a. Heng thil hrang hrang te hi zau taka sawiho niin PGCIL kawlpetha hrui thlunna project leh NEEPCO thawh mek Turial Hydel Project te pawh sawi lan a ni a, Pu A.K. Verma chuan PGCIL leh NEEPCO aiawh te chu an hnathawh mekte a hun taka zawh ani thei nan chak zawka bawhzui leh enfel turin a chah a. Sawrkar scheme thar - 24 x 7 Power for All leh UDAY scheme chungchangte pawh meeting ah hian sawilan niin heng scheme te Mizoram in tangkai zawka a chhawr thei dan kawngte pawh sawiho a ni. 

Myanmar ramri depa Mynmar lam thingtlang khaw thenkhat te eng pek chungchang cross border electrification Chief Minister in Power Minister alo sawipui tawh hma lak dan tur pawh meeting ah hian sawi niin he thil hi Ministry of External Affairs a thlen nise an ti a. Small Hydel Project tana tunah subsidy pek mek chungchangah, he thil hi zau zawka Ministry hotu dangte rawna an sawiho tur thu pawh meeting ah hian Ministry of Power aiawhten an sawi a ni. Meeting ah hian Ministry of Power aiawhte leh an mahni tawimawmtu te hian a thei ang anga vawiina thil sawi te chu an lo bawhzui tur thu leh theihtawp an chhuah tur thu an sawi.