Vawiin hian Serchhip District Election Officer, Pi Sangchhin Chinzah chuan Political Party hrang hrangte nen a pisaah July ni 1 atanga thawh tan tur Electoral Roll Special Drive chungchang sawi puina a nei. 

Pi Sangchhin Chinzah chuan, sawrkar chuan khua leh tui dik tak kum 18 tling tawhte chu electoral roll ah an chuang lovang tih a hlauh em avangin, Electoral Roll siamthat hna a kal reng laiin Special Drive a buatsaih a ni, a ti a. Mipui thlan sawrkar dinna kawngah mipuite hi kan pawimawh bera, roll-ah kim taka kan inziahluha, kan duhte ngei ram hruaitu atana thlan hi kan tih makmawh a ni, a ti. Pi Sangchhin Chinzah hian Political Party te chu Polling Booth tina Agent inruat tur leh chung Agent te chuan Booth Level Officer te a tul ang zela lo puibawm turin a ngen a ni. 

He Electoral Roll Special Drive hi June ni 1 atang khan Press Conference neia inbuatsaihna bul tan a ni tawh a, kumin January ni 1 a kum 18 tling tawh Roll a la chuang si lote zawnchhuah beihpui thlakna a ni ber a, siamthat, siamrem, hmingpaih ang chite pawh tih reng a ni bawk ang. Hna hi July ni 1 atanga thawh tan a ni anga, July ni 31 thleng a awh ang. Hemi chhung hian BLO ten an biala in tinte an fangchhuak vek dawn a ni. July thla chhunga dilna lut ang ang te chu August thla chhunga chin fel vek hman tur a ni bawk ang. 

Vawiina Party te nena Drive chungchang sawihonaah hian Election Officer Pu Abraham B. Khithei chuan DEO hi a tawiawm a, Party lam aiawhte pawh an kal tha hle a ni.

Attachment

  • Loading attachment...