Nizan khan India-a United States palai(Ambassador) Pu Richard Verma chuan Chief Minister Pu Lal Thanhawla chu a chenna inah hmuin inkawmhona tha tak an nei.

Chief Minister Pu Lal Thanhawla chuan Ambassador Pu Richard Verma chu Mizoram chanchin te hrilhin Mizoram leh Mizo mipui ten remna leh muanna atan kawng an zawh chhoh dante hrilhin kum 20 buai hnuin tunah chuan Mizoram chu India rama state ralmuang berte zinga ami anih thu a hrilh a. Mizoramah remna leh muanna atana Kohhran leh tlawmngai pawlte hnathawh sawiin tun thleng pawhin anni hian kawng engkimah Mizoram tan an thawhhlawk hle a ni, a ti a. Ambassador Pu Richard Verma chuan Mizoram chu state nuam tak anih thu a lo hriat thin chu a taka a hmuh thu sawiin a lokal hian nakina zelah Mizoram tan rah tha a chhuah a beisei thu Chief Minister a hrilh a. Vawiinah Governor leh Excise & Narcotics hotute nen inkawmhona tha tak an neih thusawiin engtin nge ruihhlo dona kawnga chak zawka Mizoram thawhpui puih dante an sawiho thu a hrilh bawk.

Chief Minister chuan India leh United States inlaichinna chu kum engemaw zat atangin a tichak turin ram pahnih ten theihtawp an chhuah chu lawmawm a tih thusawiin United States a Sawrkar piangthar pawhin he inlaichinna tichak turin theihtawp an chhuah zel a beisei tih a sawi a. Pu Richard Verma pawhin a lo zin chhan ber chu India leh United States te inlaichinna kawnga chak zawka hma lak anih thei nana kawng dap anih thu a sawi bawk.

US palai leh amah tawiawmtute pualin Chief Minister hian zanriah a buatsaih sak a ni.