Nimin (12/01/17)-a lo thleng United States palai (Ambassador) Pu Richard Verma chuan tukin zing khan Mizoram State Aids Control Society(MSACS) office tlawhin, office hotute nen HIV/AIDS do kawnga hmalakdan a sawipui.

Pu Richard Verma chuan Indo-US inlaichinna tha zawk a awm zel theih nan India ram State hrang hrang tlawh kual a Mizoram pawh lo kal a nih thu sawiin, State hrang hrangte harsatna chiang zawka hriatpuia thawhhona tha zawk siam a duh thu a sawi bawk. Mizorama HIV/AIDS hluar hi a ngaimawhzia leh India ram chu healthcare kawngah nasa taka hmalakpuia, a tul anga tanpui zel an inhuam thu a sawi a;HIV/AIDS hluar chhan zirchiang turin researcher-te tirh an huam thu a sawi a ni.

Hemi hunah hian MSACS hotute chuan powerpoint hmangin HIV/AIDS chungchanga Mizoram dinhmun an tarlang a.India ram state te zingah Mizoram chu HIV/AIDS vei tam ber dawttu a ni a.Kum 2000 hmalam kha chuan HIV/AIDS thlentu ber chu drugs hmansual a ni a,hemi hnulamah mipat-hmeichhiatna hmankhawlohna avanga vei an tam ber a,Aizawl district chu a hluarna ber ani.HIV/AIDS dona kawngah hian hmalakna hrang hrang MSACS chuan neiin Project Sunrise kaltlanga Condom Promotion Campaign te, Needle-Syringe Exchange Program(NSEP) te,Anti Retroviral Therapy(ART) leh a dangte neih a ni a, Condom Promotion Campaign hi Aizawl leh Kolasib districtah te neih niin social media kaltlangin condom hman tulna hrang hrang an tarlang a; Project Sunrise hnuaiah hian kohhran,NGO leh dan kengkawhtute nen thawkhoin HIV/AIDS do beihpui thlak a ni.

US Ambassador Pu Richard Verma hi US Consulate General, Kolkata atangin Consul for Political and Economic Affairs, Pu Prasenjit Gupta; Asst. Public Affairs Officer, Pu Greg Pardo; Media Specialist, Deepa Datta leh Political Specialist, Pi Tinku Roy ten an rawn tawiawm a ni.