Vawiin khan ama chenna inah amah lo hmuaktute hmaa thu sawiin Chief Minister hian New Delhi-a a cham chhung a January 7a NEC Meeting leh January 6  a Chief Minister Conference-ah a tel  thu te sawiin, NEC meeting-ah   hmarchhak state tih hmasawnna turah Task Force ruahmanna zulzuia kal tul a tih thu leh NLCPR leh NEC sum hmanga special category state te chhawmdawlna tur chungchangah tlangram leh phai zawla chengte chu hrut rual mai lovin Task Force rawtna angin tlangram bik tana hmasawnna ruhrel din nan central sorkar chuan sum tam zawk dah se tih a rawt a. Chief Minister Conference-ah pawh Pu Lal Thanhawla chuan a firfiaka chetna do turin mipui tam zawk an inhnamhnawih tul nia a hriat thu a sawi.

New Delhi a cham chhung hian sorkar laipui mipawimawh hrang hrang Prime Minister, Union Power Minister Sushil Kumar Shinde, Human Resources Development Minister Arjun Singh, Urban Development & Poverty Alleviation Minister Pi Kumari Selja leh Planning Commission Vice Chairman Montek Singh Ahluwalia te a hmu a. Tuirial Hydel Project tuaithar chungchangte NLUP atana special package dah rawtna te bakah Mizoram hmasawnna tura thil chi hrang hrang huam zau takin a sawipui hlawm a. Sorkar mipawimawh Ministry hrang hrang ami te pawh Pu Lal Thanhawla hian a hmu zui a, Czechoslavakia Ambassador Pu Hynek Kronilek chu a chenna inah a tlawh a, Mizoramah rawn zin thuai tura sawmin Czech leh Mizoram sorkar ten airport hmanrua leh transport tihchangtlun leh kawlphetha lamah thawk dun turin a sawm bawk a ni.

New Delhi-a Mizoram House sak tharna tur Lung chu Chief Minister Pu Lal Thanhawla hian 8, January khan Chankyapuri ah a phum nghal a ni. Rs. 740.66 lakh senga sak thar tur hi Basement leh Ground Floor bakah chhawng 3 nei tur niin mipawimawh thlenna tur leh room dang thahnemfe awm tur a duan a ni.

New Delhi a zinna ah hian Chief Minister hi Home Minister Pu R. Lalzirliana, UD&PA Minister Pu Zodintluanga leh Parliamentary Secretary Pu Lal Thanzara te bakah Mizoram sorkar officer pawimawh thenkhatin an tawiawm a ni.
 
Chief Minister hi a chenna inah Pu R.Lalzirliana, Home Minister, Pu Lalsawta, School Education Minister, Pu H.Rohluna, Food & Civil Supplies Minister, Pu John Rotluangliana, Dy.Speaker,Pu K.Lianzuala,Chairman,KVI, Pu Lalrobiaka, Chairman ZIDCO Parliamentary Secretaries Pu Lal Thanzara, Pu Chawngtinthanga, Pu S.Laldingliana, Pu Lalrinmawia  Ralte, Pu K.Lalrinthanga, MLA leh Chief Secretary thar tur Pu Vanhela Pachuau,IAS ten an lo hmuak a ni.