Nihnih chhung (22 & 23 Jan, 2009) thanga a bial chhung Serchhip leh Thenzawl khuate a tlawh hnuin Chief Minister Pu Lal Thanhawla chu vawiin khan dam takin Aizawl a lo thleng leh ta. Serchhip-ah hian ningani kalta 22.1.2009 khan Town Hall-ah lawmna inkhawm buatsaih a ni a, a tuk 23.1.2009 khan Thenzawl-a Primary School III kawttualah amah lawmna inkhawm buatsaih bawk a ni.
Serchhip leh Thenzawl khaw mipuiten ropui takin Chief Minister hi an lo lawm a. Lawmna inkhawm an buatsaihah Chief Minister chuan a bial mipuiten inthlanah an thlan tlin avangin an hnenah lawmthu a sawi a. Pu Hawla chuan kan sorkar hi congress sorkar a ni lova, Mizoram sorkar a ni a, chuvangin tumah zumzuk lo turin mipuite chu a chah a ni. A sorkar-ah tlatlum bik emaw, tlatlum lo bik emaw siam tum a nih loh thu sawiin, kan manifesto hi kan lehkhabu pawimawh tak a ni dawn a ni a ti. Pu Hawla chuan an MLA te chu fuih pawrh theih an nih loh tur thu sawilangin, hei hi an kalphung tur a ni tih a sawi a. An MLA te chu milian sa leh lal sa vek an nih avangin, intih milen emaw, intih lal emaw a ngai lo tih a hrilh thu a sawilang bawk a. Interview pawh mahni inah ni lovin, an office-ah theuh zing office tan hun atanga nei thin tura a chah thu a sawi bawk a ni.

Chief Minister chuan an tih tur hmasa ber chu mirethei-te chhanchhuah hna a ni dawn a, an tan hian jubilee dar kan vaw dawn a ni a ti. Hemi ti puitling tur hian NLUP hman a ni dawn a, a dawngtuten an dinchhuah pui ngei sorkar-in a  duhsak avangin, hmana tih ang mai mai khan a kalpui dawn lova, dik taka hman anih theih nan fir taka kalpui a ni ang a ti. A hman lohna tura hmangte chu pek chhunzawm annih loh tur thu a sawi bawk.

Thalaite hmakhua sawiin Pu Hawla chuan thalaite hi hnam ro an ni a, an tan hian sorkar-in khawvel thar a buatsaih sak mek a. Technology Mission , Sports, scholarship, ramchhung leh foreign-a hna zawn sak ah te programme thar a ngaihtuah mek a ni a ti. Chief Minister chuan sorkar hmasa kihhnawk thenfai chhung a rei deuh dawn avangin mipuite hriatthiamna a ngen a. Administration lamah District thar 3 an siamte ramri tur chinfel hna ringawt pawh  hi harsa tak anih dawn thu a sawi a. Sum lam dinhmun chinfel hna pawh a hautak hle dawn a ni a ti. Pu Hawla chuan nawrh hi a kristian lova, mahni hmasialna anih avang leh mite tana harsatna siam saktu anih avangin a sorkar-ah chuan nawrh hi phal a nih dawn loh thu a sawi bawk. Sorkar chu phuba la zawnga a kal loh tur thu a sawi bawk a. Dikna erawh huaisen taka kalpui a ni ang a ti. Hel chungchangah sorkar-in ngaihdam hun a tiam chhunga lo kir lote chu an hnungkhirh sak a ni ang a ti a. Hnathar lak chungchangah MoU chuan a sorkar chu a phuar dawn loh thu sawiin, a tulah chuan hnathar kan siam zel ang a ti. 6th Pay Commission chungchang ah CM chuan Mizoram-in kan hman ve theih nan tunah hian ngaihtuah mek a nih thu a sawi bawk.

Corruption chungchangah Pu Lal Thanhawla chuan, Mizoram-a thui taka zung kaih tawh, corruption hi nuai bo hnaa neih hmasak a ni dawn a. Tunah a kungpui kihin a awm ta a, a zung phawrh chhuakin kan phoro dawn a ni a ti. Corruption um bona kawngah sorkar inrawlh theih lohna tur Vigilance Commission din anih tur thu sawiin, hemi hnuaiah hian Anti Corruption Bureau chu tih len a ni ang, a ti a. Corruption nuai bo na tur hian kan zavaia kan tan tlan a ngai a ni a ti. Minister, MLA leh Sorkar hnathawkte chu contractor emaw, supplier emaw te lei theih turin kan awm tur a ni lo, Pu Hawla chuan a ti a. Minister-te zingah pawh corrupt pui tur an awm lovang, a ti. Sorkar hnathawkte pawhin Minister-te lei an tum tur a ni lo, a ti bawk. MLA te pawh corruption-ah an inhnamhnawih loh nan Ethic Committee din a nih tur thu a sawi a. Pu Hawla chuan politics hi eizawnna emaw, sumdawnna emaw a ni lova, ram rorelna hmanrua atan Pathian in mihringte hnena a pek a nih avangin dawt a leng lova, mahni sahmim tih puarna tur a ni bawk lo va, Party  mi leh thian leh chhungkhatte induhsakna tur a ni bawk lo a ni, a ti.

Serchhip leh Thenzawla sorkar hnathawk, Head of Office hrang hrangte a kawmna ah, Chief Minister chuan, sorkar hnathawkte chu sorkar neitu dik tak in nih avangin sorkar ah rinawma nghat tlat turin a chah a. Political party te chu an sorkar zawk a, an sorkar lo leh a, chuvangin ruling party ah rinawm tum tur a ni lo, a ti. Head of office ten an mamawh leh harsatna an neihte ziaka an thehluh te chu chinfel sak tiam ve nghal mai lovin, lo zirchian phawta, lo enpui a nih tur thu a hrilh a ni. Pu Hawla chuan keini leh sorkar hnathawkte chu a tul hun apiangah lepse kan ngam tur a ni, a ti bawk.

Chief Minister tawiawmtu Pu S. Hiato, PHE Minister pawhin thusawiin sorkar hi lal turin a ding lova, mipui rawngbawl tura ding a ni a ti a. Inthlana anmahni vote lotu zawng zawngte chu ngaihdam vek an ni a, hetih lai hian an tawiawmna erawh an phut tlat a ni a ti.

Serchhip-ah hian mi 1000 len theihna tur Auditorium sak tum mek a ni a, NBCC ten a sak hna hi an thawk ang. District Hospital kum hnih chhunga siam tum a nih thu Chief Minister chuan a sawi a. Thenzawla SDO Civil Office tur sak thuai anih tur thu a sawi bawk.

Serchhipa lawmna inkhawm hi Pu H. Darzika, Serchhip DC in a kaihruai a. Thenzawl-ah Pu Dolianbuaia, SDO (Civil) in a kaihruai thung a ni.

Chief Minister Pu Lal Thanhawla hi a nupui Pi Lal Riliani; Pu S. Hiato, PHE Minister; Pu K. Lianzuala, Chairman, KVI Board leh Lt. Col (Rtd.) Z.S. Zuala, MLA ten an tawiawm a ni.