Chief Minister Pu Lal Thanhawla chu nimin khan New Delhi ah Prime Minister Pu Narendra Modi'n NITI Aayog Governing Council thutkhawm vawi 3-na, a koh-ah a tel a, NITI Aayog ngaihpawimawh zual bik chungchanga Mizoram Sawrkar hmalakna leh hemi kawnga harsatna leh Central Sawrkar puihna hrang hrang a mamawhte dante bakah Mizoram mamawhte meeting ah hian a thlen a ni. 

Chief Minister Pu Lal Thanhawla chuan NITI Aayog in  ram leh mipui hmasawnna atan kawng hrang hranga ruahmanna a siam te chu State ten an chhawr tangkai mek tih sawiin, Centrally Sponsored Schemes, Skill Development leh Swaach Bharat Abhiyaan ah te hma lakna chak leh sawt zawk a awm thei nan Sub-Group of Chief Ministers siam chuan rah tha a chhuah mek thu a sawi a. NITI Aayog zulzuiin Mizoramah pawh State-level Task Force for Agriculture Development leh Task Force for Elimination of Poverty te chu din anih thu leh an report chu NITI Aayog ah thehluh anih thu a tarlang bawk. 

Sawrkar Laipui hmalakna thar Goods and Services Tax (GST) leh Digital India te Mizoram Sawrkarin a thlawp tih sawiin heng te hi changtlung taka kalpui turin Internet Connectivity (inthlunzawmna) tha neih phawt a tul thu a tarlang a. Hemi chungchang a sawizau naah Mizoram ang tlang ram leh geography angah optical fibre cable thlunzawmna atan leilaih a phum chu chona lian tak a ni a, chuvangin kawlphetha chawmna line hrula optical fibre line thlunzawm leh kaltir chu tha zawk nia a hriat thu sawiin hetiang lam hawi a hmalakna siam nise tiin a duhthu a sawi a. Telecom Sector, sawrkar enkawlna atanga tih zalen (decentralised) in inthlunzawmna(connectivity) tha a hringchhuak thei tih sawiin Bharat Net chu North East state ten tangkai zawka an chhawr theih nan state-te geography mil leh an mamawh te ngaihtuahna leh ruahmanna te chu chak taka kalpui a tul thu a sawi lang bawk. 

Hmarchhak  tan Interstate Air Connectivity a pawimawh thu tarlangin a bultan nan state khawpui te chu thlawhna te chi leh helicopter hmanga thlunzawm theih nise tiin hei hi bial mipui bakah ram hruaitu ten an chhawr tangkai thei dawn a ni, a ti. 

Loneitute leh kuthnathawktute thawhchhuah(a sum zawngin) a leta tihpun chungchangah Green Revolution thawh hnihna hnuaia tunlai thiamna fuankim a, Hmarchhak mamawh scheme, a chhawrtu tur te rawn chunga duang chhuak turin Sawrkar Laipui a ngen a. Retheihna umbo chungchangah hemi kaihhnawih scheme hrang hrang te chu kalpui chhunzawm zel a tul thu sawiin a hma thei ang berah retheihna tehfung 'poverty index' tihfel a tul tih a sawi bawk. 

Centrally Sponsored Schemes (CSS) awmze nei zawk (rationalization) kawngah scheme hrang hrang - Core of core, core leh optional te thliar dan chu ennawn a pawimawh tih sawiin hei hi a rang lama ennawn turin Central Sawrkar a ngen a. Hmarchhak state te tan za zelah 10 aia tam matching share pek a harsat thu sawiin scheme tam zawk chu Hmarchhak state te tan Core Scheme anga kalpui turin hma lak nise a ti bawk. Skill Development a chak zawka thalai tam thei ang berin he thil hi an chhawr theih nan Vocational Training Centre te leh Industrial Training Centre te tih changtlun leh thuamthat a pawimawh tih a sawi bawk a ni.