Vawiin dar 11 khan Innovations India buatsaihin the Leela Palace Hotel GrandBall Room, Chanakyapuri, New Delhi ah Chief Minister Pu Lal Thanhawla ho in Magnetic Mizoram Roadshow neih a ni a. He hunah hian  Pu Lalsawta, Planning Minister leh Senior official te pawh an tel a ni.

Magnetic Mizoram Roadshow ah hian Chief Minister Pu Lal Thanhawla chuan Magnetic Mizoram Summit investors meet Aizawl-ah neih tum anih thu leh chumi hunah chuan corporate leh investor te lokal turin a sawm a. Mizoram sawrkarin NEDP hmangin chak taka ram hmasawnna atana hna a thawh thu te, chumi tihlawhtling lehzual tura corporates atanga investment mamawhna a len thu pawh a sawi a ni. Mizoram in kawng hrang hrangah theihna a  neih te rawn chhawr tangkai tur leh  rawn zirchiang turin sumdawnglian kalkhawmte chu a sawm a. Sector hrang hranga investment hlawk taka kalpui theih anih ngei a rinthu a tarlang a. Mizoram chu India ramah hmasawnna thang chak ber zingah a lang thei chu lawmawm a tih thu sawiin chak zawka hmasawnna kalpui zel tura Mizoram Sawrkar hnathawhna-ah kawng hrang hranga corporates te nen thawhdun a tul thu sawiin corporate leader te, diplomatic missions aiawh te leh investor kalkhawm te thawhhopuiah a sawm a ni.

Planning Minister Pu Lalsawta pawhin thu sawiin Mizoram sawrkarin Planing Commission nuaibo anih hnuah leh 14th Finance Commission rawtna hman anih hnuah New Economic Policy duangin ram hmasawnna chak taka kalpui tura hmalakna hrang hrang tarlangin sawrkarin beiseina lian tak a neih tih a sawi a. Investors te nena an tangdun thei  anih chuan hmasawnna a chak leh zual theih a beisei thu a sawi a. Mizoram hmasawnna atana an thawhpui ngei a beisei thu a tarlang bawk. Investors ten tanpui an ngaihna leh thawhdunna tura ruahman tul awm reng reng-ah sawrkar a inhawn thu sawiin Mizoram dinhmun nasa taka chawikang turin private investment a pawimawh dan a tarlang bawk.

He roadshow ah hian Dr C. Vanlalramsanga, Planning Secretary chuan Mizoram chanchin leh dinhmun tlangpui a lem nen entirin presentation a pe a, Dr Saipari, Director, Horticulture chuan Horticulture Sector dinhmun leh thawhho theihna kawng hrang hrang te a lem nen entirin presentation a pe a, Pu Biakthanmawia Pautu, Director, Tourism pawhin Mizoram Tourism destination a siam tura hmalakna kawng hrang hrang leh private investors te pawimawhna a lem nen entirin presentation a pe bawk a ni