December ni 19, 2012 (Nilaini) khan Mizoram Chief Minister Pu Lal Thanhawla leh Agriculture Minister Pu H.Liansailova te chuan Union Agriculture Minister Pu Sharad Pawar hmuin Mizoram mamawh engemawzat an thlen a ni.
Chief Minister hi State Planning Board Member-Secretary Pu P.L.Thanga leh Principal Secretary to CM Pu Lalramthanga ten an tawiawm a, Union Minister hi Union Agriculture Secretary (Education) leh Secretary, AH&Vety leh Fishery bakah Dy. Director General ICAR ten an tawiawm a ni. Chief Minister Pu Lal Thanhawla chuan Horticulture College dinna tura Agriculture Ministry-in High Power Committee an rawn tirh mai loh avanga a hma thei anga Team rawn tir tur leh chak zawka hma laksak turin Union Minister hnena a ngenna chu Pu Sharad Pawar chuan ni 15 chhungin an rawn tirh ngei tur thu a hrilh a, Horticulture College dinna turin hma a lak nghal tur thu a hrilh bawk. Agriculture Secretary chuan Selesih AH&Vety ram pek anih theih chuan tuna Central Agriculture University hnuaiah AH&Vety College classroom leh infrastructure awmsa te hman tangkai theih a ni ang a, kum thar 2013-ah Hroticulture College tan nghal mai theih a ni ang, a ti bawk. Hei bakah Agriculture ram neihsa hman phalsak an nih chuan experimental farming tan a ni thei bawk ang, a ti.
Chief Minister-in AH&Vety Department hnuaia mamawh hrang hrang Bawngchaw tha chi (fodder production) atana tanpuina a ngen chu Pu Sharad Pawar chuan cheng vaibelchhe 11 chuang Mizoram tan Budget-ah dahhran a ni a, mamawh dan angin Project siam a nih chuan Agriculture Ministry atangin sanction kawngah harsatna a awm lo tur thu a hrilh nghal a ni.
Mizoram sangha no intodelh lohna avanga harsatna chi hrang hrang leh NLUP hnuaia Fisheries scheme-in a tawrh dante sawiin Chief Minister chuan sangha no-a intodelhna tura mamawhna a sawi chu chhangin Pu Sharad Pawar chuan National Mission for Protein Supplement (NMPS), RKVY hnuaia kalpui mek atangin harsatna a awm loh tur thu a sawi a. Union Secretary, AH&Vety and Fishery chuan mamawh angin project rawn siam turin a hrilh a, Central Sorkar chuan a rang thei ang berin sanction a tihfel sak tur thu Chief Minister a hrilh nghal bawk a ni. Chief Minister Pu Lal Thanhawla chuan a rang thei ang bera Project siam ngaite chu siama Central Sorkar hnenah thehlut turin hma rawn lak vat a ni ang tiin a hrilh a ni.
