Vawiin khan Parliamentary Secretary leh Bialtu MLA ni bawk Pu Lal Thanzara chuan Electric Veng MHIP-in vawi 5-na atan a buatsaih Telephone Directory chu Electric Veng YMA Hall-ah a tlangzarh. Directory tlangzarhna inkhawmah hian Pu Lal Thanzara nupui Pi Zohmingthangi, Electric Veng Local Council, MUP, MZP, YMA hruaitute leh mi sawm bikte an tel a ni.

Directory tlangzarhtu Pu Lal Thanzara chuan Electric MHIP ten veng chhung Directory chauh ni lo mipui mamawh engemaw zat telhna Directory changtlung tak a buatsaih leh thei chu a lawmawm a tih thu a sawi a. Mizoten hnamdangin an neih loh tlawmngai pawl lian leh hlawm tha tak tak YMA, MHIP, MUP te kan neih hi kan vanneih hle a, Kohhran pawn lama mipui leh ram tan rawngbawlna pawimawh tak kengkawhtu an ni tak meuh a ni, a ti. Kumin Krismas hi kumdang ang lo takin pawl leh mimal tam zawkten mi harsa zawk leh tanpui ngaite tan an penchhuak nasa hle a, midangte tan malsawmna thlentu nih kan tam telh telh hi a lawmawm hle a ni, a ti bawk.

Electric Veng MHIP Directory buatsaih a nih dan report-tu Pi Zomuankimi chuan Directory an chhuah theih nan Bialtu MLA Pu Lal Thanzara’n Rs.25,000/- a pek leh hlawkna pawh nei mang lova chhutsaktu Samuel Press te chungah EMHIP aiawhin lawmthu a sawi a ni.