Mizoram hmasawnna tur tul bawhzuia New Delhi-a cham mek, Chief Minister Pu Lal Thanhawla chuan vawiin chawhma khan Planning Commission buatsaih Prime Minister Dr.Manmohan Singh kaihhruaina hnuaia North East Chief Ministers’ Conference, 7 Race Course Road, New Delhi a neihah Mizorama Central Sector Projects kalpui mekte a thlen.

North East Chief Ministers’ Conference ah hian hmarchhak state hrang hranga hmasawnna ruhrel (infrastructure development) kalpui mekte chak lehzuala kal chhohpui dan tur sawiho a ni a. Chief Minister chuan Mizorama Central Sector Projects hrang hrang kalpui mekte dinhmun a sawi chhuak a. Chung zingah chuan Bairabi leh Sairang inkar rel kawng, 51.30 Kms a thui siam tur, kum 2008-2009 a Rs.2384.34 Crore senna tur sanction tawh chu, tunah hian Khamranga thlanmual a paltlang tur avanga railway thuneituten zangnadawmna cheng vaibelchhe 10.641 an la sanction fel loh avanga hna a chak loh thu a sawilang a. Inkalpawhna motor kawngpui chawikanna tura SARDP-NE Phase ‘A’ hnuaia NH-44A, NH-54 leh NH-154 hmalak turte leh cheng vaibelchhe 677.20 senna tur Kaladan Multi Modal Transport Project, 90.82 Kms a thui siam tura formation cutting 69.22 Kms zawh anih tawh thu te sawi bawkin, ram lak tur chungchanga harsatna la awm te chu Lawngtlai DC in a chinfel hna a kalpui mek thu te an sawi bawk a. SARDP-NE Phase ‘B’ hnuaia Aizawl-Lawngtlai-Tuipang kawngpui chawikanna turte an sawi bawk a ni. Lengpui Airport changtlung zawka siam a tul thu te a sawi bawk.

Hengte bakah hian Central Project dang, Power chungchanga Tuirial HEP 60 MW pechhuak thei tur siam mek, kumin 2014 a commission theih beiseiawm chungchangte, Tuivai HEP 210 MW pechhuak thei tur, central sorkarin nikum 2013a PPP mode a kalpui tur, kum 5 chhunga cheng vaibelchhe 1750.60 senga zawh hman tum a pawm tawh chungchang te leh MW 460 pechhuak thei tur Kolodyne HEP cheng vaibelchhe 2974.33 senna tur Mizoram sorkar leh NTPC ten MoA an ziah fel tawh chungchangte a sawichhuak bawk a. Inbiakpawhna lam Telecom chungchanga project pahnih Intra- District SDHQ-DHQ OFC Network leh National Optical Fibre Network (NOFN) kalpui mekte pawh Chief Minister a sawi bawk a. Mizoram leilung awmdan avanga OFC hna kalpui a chak theih loh thu leh harsatna neuh neuh a awm thin avanga Optical Power Ground Wire (OPGW) hman zawk theih dan chungchangte sawiin, sen belh ngai thei turte a thlen bawk a ni. Tin, leihnuai hausakna haichhuahna kawngah ONGC, OIL leh Reliance te chu tuialhthei leh natural gas zawnchhuah hna thawk tura thlan an nih chungchangte sawiin, OIL leh Reliance ten an thawh turah an muanchan avangin a zawnchhuah hna thawh vat vat anih theihna tura chak taka hmalakpui thuai turin Chief Minister Pu Lal Thanhawla hian Prime Minister Dr. Mammohan Singh hi a ngen nawn a ni.

Heng central sector project te bakah hian National Institute of Technology (NIT) Chaltlang, Aizawla kalpui mek leh Lengpuia an hmunpui tur chungchanga hmalak mekte, Ministry of Agriculture hnuaia College of Horticulture kum 2011a puan tawh din tur chungchangte, Mizoram University Campus a ram 5 acres a zaua Software Technology Park of India (STPI) din tur leh hemi atana Union Minister for Communication in ni 6.2.2014 a a lungphum a rawn phum tur chungchangte leh MZU Campus ah tho hmunpui nei tur, kum 2011 atanga kalpui chhoh tawh Indian Institute of Mass Communication, Regional Centre, Aizawl chungchangte an sawilang bawk a ni.

Planning Commission buatsaih hmarchhak State Chief Ministers Conference-ah hian Prime Minister Dr. Manmohan Singh chuan hmarchhak State a Infrastructure Development kalpui mek te chu a thathawkhat hle a hriat thu a sawi a ni.

Prime Minister hi Union Power Minister leh DoNER Minister te bakah Planning Commission Deputy Chairman ten an tawiawm a. Chief Minister Pu Lal Thanhawla hi Pu Lalram Thanga, Principal Secretary to Chief Minister in a tawiawm bawk a ni.

Vawiin tlai vek dar 4:00 p.m. khan Chief Minister Pu Lal Thanhawla hian Planning Commission Depuyu Chairman Montek Singh Ahluwalia chu a hmu leh nghal a ni.