Bawngkawn venga Brigade ram chu Sawrkar in a chinfel hun ah Vantlang tana hmun pawimawh siamna hmun ah hman a ni dawn. He thu hi vawiin chawhnu khan Revenue Minister Pu R.Romawia chuan ama bial chhung Bawngkawn Veng a Local Council House sak thar a hawnna ah a sawi a ni.

Hawnna inkhawm ah Minister leh bialtu MLA ni bawk Pu R.Romawia chuan Bawngkawn Veng Local council ten an mahni sum thawh chhuah liau liauva Local Council house an sual chhuak thei chu an entawn tlak thu a sawi a. Bawngkawn veng chu Aizawl kawtchhuah hmun pawimawh tak a nih avang in hmunruak leh ram ruak Local Council in a theh hunah pawh fimkhur taka ngaihtuahna seng thin turin Local Council hruaitu te chu a chah a. Bawngkawn Veng chhunga Brigade ram sipai in Mizoram sawrkar hnena a hlan tawh sawrkar in chinfel a tumna kawnga Vengchhung mipui leh khawtlang hruaitu ten thahnem ngai taka sawrkar an thawh pui tlat thin chu an fakawm hle a ni a ti a. Sawrkar chuan Brigrade ram ruak chu awmze nei leh tangkai taka mipui vantlang hmun pawimawh atana siam a tum thu a sawi. Sawrkar ruahman dan chuan Brigade ram ruak chu Hospital lian sakna hmun atan te, khelmual, fire brigade dang sakna hmun atan te leh vantlang puipunna hmun lian Convention Centre sakna hmun atan te bakah sawrkar hmun pawimawh atan te hman tum a nih thu a sawi a ni. Bawngkawn veng Local Council House hawnna programme hi vengchhung Local Council hotu ten kaihruai in Aizawl Munipal Council Ward II enkawltu AMC Councillor Pi Hmingthanzami pawh he hunah hian a tel ve a ni. He Council House hi a dung feet 26, avang feet 16, Rs 2,27,302/- senga Bawngkawn Local Council sum hmanga khawrpum a ni.