Vawiin khan Mizoram State Tobacco Control Society te buatsaihin Lungleia Chanchinthar lakhawmtute zuk leh hmuam that lohna leh Mizoram puma sawrkar hmalakna inzirtirna hun I&PR Conference Hall, Lunglei-ah neih a ni.

Distric Co-ordinator (South Mizoram), MSTCS Pu ZT Vawra Hmar chuan vaihlo leh a kaihhnawih thatlohna chungchang a sawi a; MSTCS Report-a a lan danin mipuiten an zawm that leh thatloh zirchianna ‘Compliance Study’ chu kum thum - 2009, 2011, 2013 - ah te neih tawh a ni. Lunglei bikah puipunna hmuna meizu chu kum 2009-ah 66.66 % niin 2011-ah chuan za zelah 14.3% ah a tla thla a. Zirchianna thar berah erawh 15.6 % niin a zirchianna hmasa aiin puipunna hmuna meizu thin an pung ta hlek zawka hriat a ni. Mizoram pumah nasa takin hmasawnna hmuh tur a awm a, zirchianna hmasa ber 2009-ah puipunna hmuna meizu 61.7% niin, 2011 ah 18.2%, 2013 -7.9% ah a tla hniam thei thung a ni. Tobacco Control hian hmalakna hrang hrang neiin kum 2013 chhungin Ati-Tobacco Squad Drive vawi 21 neiin mi 65 an man tawh a, cigarette packet 262 an man tawh bawk a ni. Zira in hrang hrangah Anti-Tobacco Awareness vawi 67 nei tawh niin kohhran hrang hrangah vawi 17, mipuiah vawi 2 an nei bawk. Hei bakah hian Tobacco Free School Campaign hi vawi 5 nei tawhin kumin chhung hian tam zawk neih belh theih an inbeisei a ni.

Lunglei-ah chuan Tobacco Cessation Clinic, Civil Hospital OPD Room NO 11-ah vaihlo sim duh mi 484 enkawl niin, heng zinga 17.37% ten an sim tawh a ni. Vawiina Press Meet hi Dr SR Ngurchamliana, Consultant in Medicine-cum-District Focal Point NTCP, Lunglei District-in a kaihruai a ni.