Vawiin khan Horticulture, etc. Minister leh Lunglei North Bialtu ni bawk Pu PC Lalthanliana chuan Lunglei DC Conference Hall-ah Lunglei District chhunga Department hrang hrang hotute ko khawmin sorkar thar hmalak tumna te hrilhin thawhhona tha nei turin a sawm a ni.

Vawiina District Heads of Departments kawmna Lunglei DC Pu V.Sapchhunga kaihhruaiah hian Pu PC Lalthanliana chuan Lunglei chu Mizoram-a khawpui lian ber dawttu ‘second capital’ a nih angin he district enkawl tura ruat Officer hrang hrangte pawh fel leh rinawm taka hnathawk turin sorkarin a beisei a ni, a ti. Mipuite pawhin beiseina sang tak neiin an aiawh tur MLA-te an thlang thin a, mipuite leh ram hmasawnna kalpui tak tak dawn chuan sorkar hnathawkte nena thawhhona leh inhriatpawhna langtlang tak nei a tul thu sawiin Minister chuan neitu thinlung pua Lunglei District an enkawl chhungin mipui leh he bial atan engemaw tak mellung pawimawh phun ngei turin a chah bawk a ni. Lunglei hmasawnna atana a ngaih pawimawh thenkhat sawiin Pu PC Lalthanliana chuan khawpui chhung kawng siamthat te, khawpui chhunga eng  ‘street light’ dah belh te, Lunglei leh a chhehvel khua atan tui pek that zawk theih dan tur te, mipui hriselna lama hmasawnna chak zawka hmalak a tul thu te leh Lunglei District huamchhung, a bik takin, ama Bial chhunga khua/veng tinte tan Plan mumal zawk siam te chu a hmachhawp zingah a tel thu a sawi bawk a ni.

Lunglei West Bialtu Pu Chalrosanga Ralte pawh vawiina Officals-te kawmna hunah hian thu sawiin Minister/MLA te leh sorkar officials te inkarah thawhhona tha pawimawhzia a tarlang a, sorkarin mipuite tan ruahmanna a siam thin leh a hmalakna hrang hrangah te anmahni chu finchhuah fo turin sorkar hnathawkte a chah bawk a ni.