Vawiin khan Mizoram Government Ad Hoc Aided High School Teachers Association(MIGAHTA)chuan Chanmari YMA Hall-ah Special Conference an hmang a. Chief Minister Pu Lal Thanhawla te nupa in an hmanpui a ni.

Chief Minister chuan zirna lama Mizoram hmasawnna chu missionary hmasa te thawh rah a ni tiin zirtirtute chu nu leh pate ro chan hlu ber enkawltu an nih avangin finna leh thiamna zirtir piah lamah naupangte entawn tlaka an nun invawng uluk turin a ngen a. Tunlai thiamna leh technology hmasawnna thar zel mila intuai thar ve zel turin a chah bawk.

Mizoram sorkarin kawng hrang hranga ram hmasawnna tur ruahmanna a siam te leh hma a lak dan te sawiin Chief Minister chuan zirna lamah pawh term hmasa atang tawha Education Reform Commission din a nih thu a tarlang a. All India Service leh Service hrang hrang, Army leh Paramilitary ah te thalai tam zawk an tlin leh theihna turin nasa taka tan lak a tul tiin hemi atana naupangte chher kawngah zirtirtute an pawimawhin an mawhphurhna a lian hle a ni, a ti a. Sorkar hna thawk lo te pawh eizawnna kawng dangah mi hlawhtling, khua leh tui tha an nih theihna turin quality education an neih a pawimawh hle a ni, a ti.

MIGAHTA conference ah hian Pi Lal Riliani, President, Indian Society of Tobacco & Health, Mizoram Chapter chu special guest niin vaihlo zuk leh hmuamin Mizo mipui te hriselna a khawih chhiat nasat dan leh a nghawng thalo ramin a tawrh mek dan sawiin zirtirtute chu naupang te entawn atan vaihlo zuk leh hmuam laka fihlim ngam tur leh naupang te pawh hemi kawnga zirtir turin a ngen a. Tuna vaihlo zuk leh hmuam chi hrang hrang kan uar dan leh hemi avanga kan tawrh nasat dan thlirin hmelma tan chuan “Mizoram chu ralthuam danga run kan ngai lo” a ti a. Zuk leh hmuam dona kawnga ISTH in kum 1989 atanga theihtawp a lo chhuah ve na chuan rah a nei chho mek chu lawmawm a tih rualin nasa taka tanlak chhunzawm zel a tul tih a sawi a. Zirtirtu kal khawm te chu an thawhna district theuh ah zuk leh hmuam dona kawnga ISTH hmalakna puitu leh an campaigner ni turin Pi Ri-i chuan a sawm a ni.

MIGAHTA special conference ah hian Vice President Pu David L.C.Chhakchhuak kaihruaiin chawhma hunah rorelna neih a ni a. Hetah hian an member thi te sunna hun hman a ni a. Resolution 3 an neih te chu chatlak lova hlawh an lak theih avanga Mizoram sorkar chunga lawmthu sawina te, tuna an hlawh lak mek Basic Pay+ half allowance chu full alowance anga pe tura sorkar ngenna leh an dam loh a medical reimbursement bill phalsak ve tura sorkar ngenna te a ni. MIGAHTA special conference ah hian General Secretary Pu J.Lalvarlianan report a pe a. Chawhnu hun hi President Pu Lalzirliana’n a kaihruai thung a ni.