India sorkarin November 8,2016 zanlai atanga Rs. 500 leh Rs. 1000 note a tih thih chu Mizoram Governor Lt Gen (Rtd) Nirbhay Sharma, PVSM, UYSM, AVSM, VSM chuan hlemhletna leh pawisa lem tihbona tura hmalakna tha leh sorkarina a tih tur dik tak a ti nia a hriatthu sawiin, Mizoram mipui zawng zawngte pawhin ram puma sum vaivir thenfaina leh siamthatna sorkar hmalakna hi a lawmawm hle a thlawp tlat turin a ngen.
Mizoram Governor chuan note inthlak tur chungchangah state sorkar pawhin theihtawp chhuah zelin mipui ten he thil avanga harsatna an tawh chu a rang thei ang bera sutkian dan a ngaihtuah zel a, RBI hotute pawh biain a hma thei ang bera Mizoramah Rs.500 leh Rs.2000 note thar tithleng turin a hriattir tawh a. Hemi hun chhunga mipuiten harsatna tawk deuh mahse thil tha zawk inherchhuah theihna tura sorkar laipui hmalakna hi dawhthei leh lungruala taka thlawp a pawimawh ang a ni, a ti.
Rampumah pawisa inthlak hun chhung hi sorkar pawhin a reilo thei ang bera kalpui a tum a, hun reiloteah nunphung pangngai kan awh theih beiseiin sorkar hmalakna hi a eng zawnga thlir thiam turin leh pawm thiam turin mipuite a chah a ni.
