Nimin tlai khan TNT, Muanna Veng, Zuangtuiah Pu Lal Thanzara Minister i/c Health, IPR, etc.., chuan a nu, Pi Lalsawmliani hriatrengna atan a unaute nena an sak, Calvary Compreshensive School Building a hawng.
He mi hnuah hian Mizoram Volleyball Association in hmeichhia leh mipa team tana tournament a buatsaih, MVA Invitational Tournament,2016, state pawnlam leh chhunglam team thazual te inelna, TNT Volleyball Court-a nghah tur chu a hawng tel nghal a ni.
Pu Lal Thanzara chuan TNT -ah leh charity home hmundangah te midang te tana luangchhuak duhtan rawngbawlna hmun a awm reng nia a hriat thu a sawi a. Zonunmawi leh midangte puih tumna nun chu a in an thu a tarlang. TNT naupangte hnenah fuihna thu sawiin nu leh pa nei tam tak te neih loh nu leh pa fel tak tak, TNT-ah tamtak an nei tih hrilh in zirna hmun tha tak an neih bakah nunkawng dika kawhhmuhtute an neia an vannei em em a ni a ti. TNT atanga an puitlin hunah engah nih an tum tih inzawt in tumna leh nihtum an neih phawt chuan an la hlawhtling dawn tiin TNT naupangte chu a fuih a. Mizoramah thalai tam tak lehkhathiam si hnathawhtur hrelo an awmna chhan pakhat chu college an kal thleng pawha eng nih nge an tum la hre lo te an tam vang a ni ti in Minister chuan zirlai dang te pawh hlawhtling turin tum an nei em tih in enfiah turin a chah.
MVA Invitational Tournament, 2016 hi TNT Volleyball Court, Muanna Vengah November 18 thleng khian neih a ni dawn a. Mipa team ah - TNT Volleyball Club, Chhinga Veng Volleyball Club, Border Security Force(Manipur), Hunthar Veng Volleyball Club, 3rd Bn MAP, Assam Riffles(Tripura) leh Gorkha Training Centre(Shillong) te an inel dawn a. Hmeichhia Team ah Electric Veng Volleyball Club, Vaivakawn Volleyball Club, Power Department Sporting Club leh Durtlang Sporting Club ten nomawi an inchuh thung dawn a ni.
